Onlayn ictimai-siyasi qəzet
İmedi: ATƏT-in hazırkı sədri Tiflisdə yolu qanunsuz bağladığı üçün cərimələnib
Gürcüstanın hökumətyönlü “İmedi” telekanalının məlumatına görə, ATƏT-in hazırkı sədri və Finlandiyanın xarici işlər naziri Elina Valtonen Tbilisidə “yolu qanunsuz bağladığına görə” 5000 lari məbləğində cərimə edilib.
Musavat.com xarici agentliklərə istinadən xəbər verir ki, kanalın xəbərinə əsasən, bu məlumatı Gürcüstan Daxili İşlər Nazirliyi də təsdiqləyib.
Adətən bu cür inzibati cərimələr etiraz aksiyaları zamanı yolun bağlanmasında iştirak edən şəxslərə tətbiq olunur. Bəzi hallarda isə hadisələri işıqlandıran jurnalistlər, o cümlədən xarici media nümayəndələri də bu sanksiyalara məruz qalıblar.
14 oktyabrda Gürcüstana səfəri çərçivəsində Elina Valtonen Parlament binası qarşısında keçirilən etiraz aksiyasına baş çəkib. O, aksiya iştirakçılarına dəstək ifadə edib və video müraciətində bildirib ki, “Rustaveli prospektində toplaşan vətəndaşlar ölkələrinin repressiv siyasi kursundan narahatdırlar”. Valtonen vurğulayıb ki, “insanların demokratiya, söz azadlığı və əsas insan haqlarına sahib olmaq hüququ var”.
Bundan sonra Gürcüstan hökumət administrasiyası Valtonenlə baş nazir İrakli Kobaxidze arasında planlaşdırılmış görüşün ləğv edildiyini açıqlayıb. Rəsmi izahda bu addımın “qanunsuz aksiyada iştiraka görə” atıldığı bildirilib. Lakin Finlandiya Xarici İşlər Nazirliyi bu məlumatı təkzib edərək bəyan edib ki, görüş “proqram cədvəli ilə bağlı səbəblərdən” fin tərəfi tərəfindən təxirə salınıb.
16 oktyabrda Elina Valtonen X (keçmiş Twitter) platformasındakı hesabı vasitəsilə baş nazir Kobaxidzeyə şəxsən müraciət edib. O, növbəti bəyanatında bildirib ki, Gürcüstanın gələcəyini yalnız gürcü xalqı müəyyən edə bilər, və bu prinsip ATƏT-ə üzv olan bütün dövlətlər üçün eyni dərəcədə keçərlidir.
Hadisə Gürcüstan və Finlandiya arasında diplomatik gərginlik yaradıb və regionda demokratik dəyərlərin vəziyyəti ilə bağlı yeni müzakirələrə səbəb olub.
Musavat.com
XƏBƏR LENTİ
17 Oktyabr 2025
ŞƏRHLƏRŞƏRH YAZ