Onlayn ictimai-siyasi qəzet
Ermənistanda yerli seçkilər Paşinyan hakimiyyətinə siqnal göndərdi: revanşist qüvvələr güclənir, sülh prosesi təhlükədədir
Ermənistanda keçirilmiş son yerli seçkilər ölkənin daxili siyasi mühitində ciddi silkələnməyə səbəb olub.
Xüsusilə Gümrü və Parkar şəhərlərində baş verənlər, baş nazir Nikol Paşinyanın rəhbərlik etdiyi hakim Vətəndaş Müqaviləsi partiyasının ciddi itkilərlə üzləşdiyini göstərir. Seçkilərin nəticələri yalnız yerli idarəetməyə deyil, bütövlükdə Ermənistanın gələcək siyasi kursuna, o cümlədən Azərbaycanla aparılan sülh danışıqlarına da təsir göstərə bilər.
Musavat.com xəbər verir ki, Gümrü və Parkarda məğlub olan Vətəndaş Müqaviləsi partiyasının bu uğursuzluğu Paşinyanın liderlik etdiyi siyasi blokun artıq əvvəlki kimi güclü olmadığını göstərir. Bu məğlubiyyət təkcə yerli səviyyədə etimadın azaldığını yox, eyni zamanda ölkə üzrə genişlənən narazılığın əlamətidir. Məhz bu səbəbdən analitiklər artıq 2026-cı ildə keçiriləcək parlament seçkilərində Paşinyan komandasının hakimiyyətdə qalma ehtimalını ciddi şəkildə şübhə altına alırlar.
Siyasi müşahidəçilər Paşinyanın mövqelərinin zəiflədiyini sadəcə seçki nəticələri ilə yox, ictimai rəy sorğuları ilə də əsaslandırırlar. 2021-ci ildə keçirilmiş növbədənkənar parlament seçkiləri ərəfəsində Vətəndaş Müqaviləsinin reytinqi 25 faiz civarında idisə, 2025-ci ilin əvvəlində aparılan sorğular bu göstəricinin cəmi 11 faizə düşdüyünü ortaya qoyub. Bu rəqəmlər göstərir ki, Ermənistan cəmiyyətində Paşinyan hökumətinə olan dəstək kəskin şəkildə azalıb və seçici bazası ciddi şəkildə dağılmaqdadır.
Gümrüdə ən çox səs toplamış müxalif Kommunist Partiyasının namizədi Vardan Qukasyanın revanşist ritorikası isə xüsusi narahatlıq doğurur. Qukasyan açıq şəkildə “dənizdən dənizə Böyük Ermənistan” ideyasını müdafiə edir ki, bu da nəinki daxili siyasi radikallaşmaya yol açır, həm də Ermənistan-Azərbaycan münasibətləri üçün təhlükə siqnalıdır. Belə ideologiyaların parlament səviyyəsinə keçməsi regionda gərginliyin artmasına səbəb ola bilər.
Digər tərəfdən, Gümrü və Parkarda seçkilərdə qalib gələn qüvvələrin əksəriyyəti keçmiş prezidentlər – Robert Köçəryan və Serj Sarqsyanın siyasi dairələrinə bağlı şəxslərdir. Bu qruplar ictimai reaksiyalardan çəkinərək açıq şəkildə Köçəryan və Sarqsyanla əlaqələrini etiraf etməsələr də, onların ideoloji xəttini davam etdirirlər. Beləliklə, Ermənistanda revanşist qüvvələrin siyasi səhnəyə geri qayıtdığı müşahidə olunur.
Bu fon isə ciddi bir sualı gündəmə gətirir: xalq arasında nüfuzu azalan və legitimliyi mübahisə doğuran bir liderin Azərbaycanla imzalayacağı sülh sazişi nə qədər uzunmüddətli ola bilər? Paşinyanın bir il sonra hakimiyyətdən getməsi halında, yeni gələcək hakimiyyət bu sənədi tanıyacaqmı? Bu suallar təkcə Ermənistanın daxilində deyil, Azərbaycan və beynəlxalq vasitəçilər arasında da narahatlıq doğurur.
Yerli seçkilərdə revanşist qüvvələrin uğur qazanması Ermənistanda barışığa deyil, daha çox keçmiş münaqişə xatirələrinə söykənən ideyaların populyarlaşdığını göstərir. Bu isə Ermənistan cəmiyyətində sülhə real sosial sifarişin zəif olduğunu sübut edir. Belə bir şəraitdə regionda dayanıqlı və qalıcı sülhə nail olmaq heç də asan görünmür.
Yəni Ermənistanda baş verən lokal seçkilər, əslində, ümummilli və regional əhəmiyyət daşıyır. Revanşist əhvalların güclənməsi və Paşinyan hökumətinin zəifləməsi yalnız Ermənistan daxilində deyil, Cənubi Qafqazda sabitliyə də mənfi təsir göstərə bilər. Bu səbəbdən beynəlxalq vasitəçilər və region ölkələri vəziyyəti diqqətlə izləməli və uyğun mövqelər formalaşdırmalıdır.
Əli Rais,
Musavat.com
XƏBƏR LENTİ
17 Aprel 2025
16 Aprel 2025
ŞƏRHLƏRŞƏRH YAZ