Onlayn ictimai-siyasi qəzet
Bütün Dünya Azərbaycanlıları İlham Əliyevi dəstəkləyəcək
Diasporla İş üzrə Dövlət Komitəsi 31 dekabr – Dünya Azərbaycanlılarının Həmrəyliyi Günü və Yeni il münasibətilə “Bir olaq, həmrəy olaq!” adlı videokonfrans keçirib.
Dövlət Komitəsindən Musavat.com-a verilən məlumata əsasən, virtual konfransda 77 ölkədən 700 nəfərə yaxın soydaşımız, türk diasporunun və Azərbaycana dost ölkələrin nümayəndələri iştirak ediblər.
Azərbaycanın Dövlət Himninin səsləndirilməsi ilə başlayan tədbirdə ölkəmizin ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.
Tədbir “Heydər Əliyev İli” çərçivəsində dünyanın müxtəlif ölkələrində Azərbaycan diasporunun keçirdiyi silsilə tədbirlərdən bəhs edən videoçarxın nümayişi ilə davam etdirilib.
Diasporla İş üzrə Dövlət Komitəsinin sədri Fuad Muradov soydaşlarımızı böyük tarixi hadisə – Azərbaycanın ərazi bütövlüyünün və suverenliyinin tam bərpa olunması, Dünya Azərbaycanlılarının Həmrəyliyi Günü və Yeni il münasibətilə təbrik edib. Bu tarixi proses zamanı Azərbaycan həqiqətlərinin dünya ictimaiyyətinə çatdırılması istiqamətində nümayiş etdirdikləri birlik və həmrəyliyə görə soydaşlarımıza və ölkəmizin dostlarına təşəkkürünü bildirib. Bu mütəşəkkilliyin əsasında dövlətimizin xaricdə yaşayan soydaşlarımıza qayğısının dayandığı, Prezident İlham Əliyevin Azərbaycan diasporunun dünyada real gücə, söz sahibinə çevrilməsi məsələsinə daim diqqət yetirdiyi, diasporumuzun çevikliyində və birliyində Heydər Əliyev Fondunun prezidenti, Azərbaycan Respublikasının Birinci vitse-prezidenti Mehriban xanım Əliyevanın rəhbərliyi ilə həyata keçirilən layihələrin xüsusi rol oynadığı nəzərə çatdırılıb. 7 fevral 2024-cü ildə Azərbaycanda növbədənkənar Prezident seçkilərinin keçiriləcəyini xatırladan sədr xarici ölkələrdə yaşayan Azərbaycan vətəndaşlarını səsvermədə aktiv iştirak etməyə çağırıb.
Diaspor fəalları çıxışlarında Azərbaycanın suverenliyinin və ərazi bütövlüyünün tam bərpa olunmasına görə ölkə rəhbərliyinə minnətdarlıqlarını bildirib, xalqımızı bayramlar münasibətilə təbrik ediblər. Azərbaycan Bayrağının ölkəmizin bütün şəhər və kəndlərində ucaldılmasına nail olan Prezident İlham Əliyevin xalqımızın şərəfini və qürurunu özünə qaytardığı xüsusilə vurğulanıb. Dövlət başçısını doğum günü münasibətilə təbrik edən soydaşlarımız qeyd ediblər ki, 7 fevral 2024-cü il prezident seçkilərində İlham Əliyev dəstəkləyəcək, bundan sonra da vətənimizin dünyada təbliği, milli maraqlarımızın müdafiəsi, diaspor fəaliyyətinin gücləndirilməsi yolunda daha güclü şəkildə çalışacaqlar.
Videokonfrans boyunca xaricdəki soydaşlarımızın təbrik videomüraciətləri və müxtəlif musiqi nömrələri təqdim olunub. 24 ölkədən 42 nəfər soydaşımız “Diaspor fəaliyyətində xidmətə görə” Azərbaycan Respublikasının medalı ilə təltif edilib.
Musavat.com
XƏBƏR LENTİ
28 Noyabr 2024
ŞƏRHLƏRŞƏRH YAZ