Onlayn ictimai-siyasi qəzet
Assanja dəstək aksiyası - Londonda Ekvador səfirliyinin önündən FOTOREPORTAJ
Londonda Ekvador səfirliyinin önündə “WikiLeaks” portalının təsisçisi Culian Assanja dəstək aksiyası keçirilib.
Aksiya Culian Assanjın Londonun Belmarş həbsxanasında saxlanılmasının 5 illiyi ilə əlaqədar təşkil olunub. O, beş il öncə aprelin 11-də Britaniya polisi tərəfindən Ekvador səfirliyində həbs edilib və Belmarş həbsxanasına gətirilib.
AZƏRTAC-ın müxbiri xəbər verir ki, Culian Assanjın dəstəkçiləri Londondakı Ekvador səfirliyinin binası önündə, əllərində “Assanjdan əllərinizi çəkin”, “Assanja azadlıq”, “ Assanjın mühakiməsinə son verin” yazılı plakatlar tutub, şüarlar səsləndiriblər.
Aksiya iştirakçılarından David Mizraçi beş il əvvəl, Culian Assanjın həbsindən sonra onun məhkəmə işini yaxından izləməyə başladığını deyib. O bildirib ki, Culian Assanj ABŞ-a ekstradisiya edilərsə, böyük ehtimalla həyatının qalan hissəsini həbsdə keçirəcək və ədalətli mühakimə olunmayacaq. O, Culian Assanja dərhal azadlıq tələb edib.
Qeyd edək ki, 2012-ci ildə İsveçin ona qarşı seksual cinayət ittihamından sonra Ekvadorun Londondakı səfirliyinə sığınan Assanj orada təxminən yeddi il gizlənib. 2019-cu il aprelin 11-də Britaniya polisi onu Ekvador hökumətinin razılığı ilə həbs edib. Bundan sonra ABŞ hakimiyyəti Culian Assanja qarşı casusluq və məxfi informasiyanın yayılması ilə bağlı 17 epizoddan ibarət yeni ittihamlar irəli sürüb.
Bu il martın 26-da Britaniya məhkəməsi Assanjı dərhal ABŞ-a təhvil verməkdən imtina edib. Hakimlər bildiriblər ki, ABŞ səlahiyyətliləri onun ABŞ-a ekstradisiya ediləcəyi təqdirdə başına nə gələcəyinə dair əlavə zəmanət verməsələr, Assanj apellyasiya şikayəti verə biləcək.
Növbəti məhkəmə iclası mayın 20-nə təyin edilib.
Aytən Abbaslı
AZƏRTAC-ın xüsusi müxbiri
London
XƏBƏR LENTİ
25 Dekabr 2024
ŞƏRHLƏRŞƏRH YAZ