İnsanlara hürriyət, millətlərə istiqlal!

ABŞ-la Azərbaycanın mümkün tərəfdaşlıq sazişi

Ekspert: “Trampın yenidən prezident seçilməsi Azərbaycan-ABŞ əlaqələrinin keyfiyyətcə yeni mərhələyə keçməsinə təkan verə bilər”

Rəsmi Bakı  Ağ Evdəki hakimiyyət dəyişikliyindən sonra ABŞ-la strateji tərəfdaşlıq sazişi imzalamağın mümkünlüyü haqda  mövqe ifadə edib. Bir faktı  yada salaq  ki, Azərbaycan  öz dövlət müstəqilliyini bərpa edəndə  Vaşinqton  Türkiyə, Pakistan, Rumıniya və İsveçrədən sonra olsa da, Moskvadan iki ay  əvvəl - 1992-ci il yanvarın 23-də bu qərarı rəsmən tanımışdır. İki ölkə arasında münasibətlərdə ziqzaqlar olsa da, Bayden iqtidarı Azərbaycana qarşı açıq-açığına ədalətsiz mövqe sərgilədi. Tramp administrasiyasının gündəmi indi fərqlidir, amma Azərbaycan-ABŞ münasibətlərinə diqqət azalmayıb. 

Qüdrət Həsənquliyev: "Tələsmədən işləməliyik” - MÜSAHİBƏ

 Qüdrət Həsənquliyev

Deputat, Ədalət, Hüquq, Demokratiya (ƏHD) Partiyasının sədri Qüdrət Həsənquliyev Xalqcəbhəsi.az-a müsahibəsində iki ölkə arasında münasibətlərin bundan sonrakı inkişafı ilə bağlı danışıb. Deputat “ABŞ-la əməkdaşlıq etməli, amma onunla nə dost, nə də düşmən olmamalıyıq” mövqeyinə belə aydınlıq gətirib: “Son 10 illiklər ərzində ABŞ cəmiyyəti tam olaraq ikiyə parçalanıb.Tramp administrasiyası özündən öncəki administrasiyanın ABŞ dövləti adından imzaladığı sənədləri, müqavilələri tanımır. Sanki administrasiyalar ayrı-ayrı dövlətlərdir. Zelenski nümunəsi gözümüz önündədir. O, Baydenlə 2024-cü ilin iyununda təhlükəsizliyə dair 10 illik saziş imzalamışdı. Amma bu gün Tramp onu aşağılayır və kapitulyasiyaya məcbur edir. Biz Trampla dostluq etsək, sabah başqa bir ABŞ prezidenti də  onunla saziş imzaladığımıza görə bizi incidəcək. ABŞ siyasi sistemində qütbləşməyə son qoyulmayana, beynəlxalq hüquqa və öhdəliklərə ciddi əməl olunmayana, siyasi sistemdə islahatlar aparılmayana qədər bu ölkə ilə müəyyən məsafə saxlamalıyıq”.

Partiya sədri ABŞ-dakı səfirin Azərbaycanın strateji müttəfiqlik sazişi imzalamağa hazır olduğu barədə dediklərinə belə münasibət bildirib: “Açıqlama verməmişdən öncə diplomatik kanallarla ABŞ-ın mövqeyini öyrənmək lazımdır. Onlar buna hazır deyilsə, yüngülsaqqal olub özümüzə problem yaratmağa dəyməz. Qonşularımızın, müttəfiqlərimizin bu məsələyə nə dərəcədə həssas yanaşacağını da nəzərə almalıyıq.  Biz gözləməliyik ki, ABŞ bizimlə strateji müttəfiqliyə dair saziş imzalamaq istəyirsə özü belə təşəbbüslə çıxış etsin. Amma ABŞ etibarlı tərəfdaş olmadığından - Ukrayna gözümüzün önündədir -  bunun təhlükəli olduğunu növbəti dəfə xatırladıram. Rusiyanın istəyi ilə ABŞ bu bölgədən tamamilə çıxa bilər. Rusiya-ABŞ danışıqlarının sonunu gözləmək lazımdır”.

Yusif Bağırzadə: Bu, Azərbaycan dövlətinin insan həyatını ən ali dəyər kimi  qiymətləndirməsinin ən bariz nümunəsidir - "İki sahil"

Yusif Bağırzadə 

Politoloq Yusif Bağırzadə “Yeni Müsavat”a bildirdi ki, Azərbaycanın bu və ya digər dövlətlərlə ikitərəfli münasibətlərində diqqət etdiyi əsas məqam bu münasibətlərin bərabərhüquqlu və qarşılıqlı faydalı olması ilə bağlıdır: "Məhz bu prinsiplər əsasında qurulan qarşılıqlı münasibətlərin nəticəsidir ki, Azərbaycan rahat şəkildə bir-biri İlə elə də yaxşı münasibətləri olmayan dövlətlərlə belə, ayrı-ayrılıqda strateji müttəfiqlik münasibətləri qura bilib. Həm Türkiyə, həm də İsraillə münasibətlərimiz və ya həm Rusiya, həm də Ukrayna ilə münasibətlərimiz buna əyani sübutdur. İndi də ABŞ-la strateji müttəfiqliklə bağlı hər hansı saziş imzalamaq üçün imkanlar varsa, bunun üçün ABŞ-Rusiya danışıqlarının nəticəsini gözləməyə ehtiyac yoxdur. Bizim üçün prioritet olan müttəfiqlik münasibəti quracağımız ölkə ilə ikitərəfli münasibətlərimiz və bu münasibətlərdən ölkə olaraq əldə edəcəyimiz fayda olmalıdır. Çünki bizim hər hansı ölkə ilə münasibətlərimiz üçüncü bir ölkəyə qarşı yönəlməyib.

Konkret ABŞ-a gəldikdə isə bu ölkə ilə otuz ildən artıq tarixə malik diplomatik münasibətlər var və bu da əslində hər iki dövlətin qarşılıqlı əlaqələrdə maraqlı olmasından xəbər verir. Trampın yenidən prezident seçilməsi Azərbaycan-ABŞ əlaqələrinin keyfiyyətcə yeni mərhələyə keçməsinə təkan verə bilər. Məlumdur ki, Trampın əvvəlki prezidentliyi dövründə ABŞ-Azərbaycan münasibətləri yüksək səviyyədə olub".

Politoloq qeyd etdi ki, ikinci bir tərəfdən ABŞ dünya siyasətini müəyyənləşdirən əsas güclərdən biridir və belə bir güclə münasibətlərin inkişaf etdirilməsi, xüsusilə də indiki, yeni dünya düzəninin formalaşma mərhələsində bizim üçün əlavə imkanlar aça bilər: “Avropa və Asiya arasında körpü rolunu oynayan ölkəmizin gələcək dövr üçün qlobal əməkdaşlığın inkişafında açar rolunu üstlənəcəyi şübhəsizdir. Bu, Azərbaycanın bütün dünya üçün iqtisadi marağını artırır. Eləcə də ABŞ qlobal iqtisadi əməkdaşlıqda Azərbaycanın rolunun daha da möhkəmlənməsi üçün mühüm addımlar ata bilər”.

Qabil Hüseynli özünü öldürən qazidən danışıb, ağladı - VİDEO Pravda.az

Qabil Hüseynli 

Politoloq Qabil Hüseynli isə hesab edir ki, Donald Trampın ikinci hakimiyyətinin birinci hakimiyyətindən xeyli dərəcədə fərqli olacağı son bir aydakı fəaliyyətindən görünür: “Tramp birinci hakimiyyəti dövründə Azərbaycan-Amerika münasibətlərini gərginləşdirməmək xəttini davam etdirməyə üstünlük verirdi. İndi qarşıdakı 4 ilə yaxın bir zamanda - əgər hakimiyyətdən hər hansı səbəbdən vaxtından tez getməyəcəksə - Azərbaycana, Cənubi Qafqaza yönəlik siyasətinin necə olacağı hələ dəqiq deyil. Tutaq ki, Azərbaycan, səfirin dediyi kimi, ABŞ-la strateji müttəfiqlik müqaviləsi imzalamağa hazırdır, gəlin görək ABŞ, şəxsən prezident Tramp buna hazırdırmı, bunu indiki vəziyyətdə istəyirmi. Mən belə hesab edirəm ki, Donald Trampın özü belə ABŞ-ın Cənubi Qafqaz ölkələri, o cümlədən bu bölgənin əsas dövləti Azərbaycanla münasibətlərinin hansı səviyyədə davam etdirilməsi məsələsində qərarlı deyil. Belə demək mümkündürsə, ABŞ-ın özü bunun üçün Rusiya-Ukrayna müharibəsinin başa çatmasını gözləyir”.

Politoloqun fikrincə, məsələnin başqa bir tərəfi ondan ibarətdir ki, Rusiyaya yaxınlığı ilə fərqlənən Tramp bu gün ABŞ-Rusiya münasibətlərini düzəltməyi qarşısına məqsəd qoyub: “ABŞ-la Azərbaycan arasında strateji müttəfiqlik müqaviləsinin imzalanmasından isə Rusiyanın razı qalmayacağını sübut etməyə ehtiyac yoxdur. O zaman sual olunur: ABŞ-ın Rusiya ilə konfrontasiyaya getməyin əleyhinə olan yeni prezidenti Rusiyanı narazı salacaq addımı atacaqmı? Məncə, bu sualın cavabı aydındır. Ukraynaya görə Rusiya ilə vuruşmağa qarşı olan ABŞ sabah Azərbaycana görə Rusiyanın xətrinə belə dəymək istəməz”.

Etibar SEYİDAĞA,
“Yeni Müsavat”

ŞƏRHLƏRŞƏRH YAZ

Şərh yoxdur

XƏBƏR LENTİ

12 Mart 2025

BÜTÜN XƏBƏRLƏR