Onlayn ictimai-siyasi qəzet
60 konqresmenin “907-ci düzəliş” ağrısı
Ermənipərəst qüvvələr dövlət katibini Azərbaycana təzyiqləri gücləndirməyə çağırıb - Bakıdan reaksiya
ABŞ Nümayəndələr Palatasının 60 üzvü dövlət katibi Marko Rubioya çağırış edib. Demokrat Frenk Pallone, respublikaçı Maykl Lavlerin də daxil olduğu qrup Amerikadan Azərbaycana tətbiq edilən “907-ci düzəliş”in gücləndirilməsini tələb edib. Konqresmenlər həmçinin erməni yalan təbliğatını da təkrarlayıblar. “Azərbaycanı "etnik təmizləmə" yolu ilə 120 min erməni xristianı Qarabağdan qovmaqda, Ermənistanın suveren ərazisini işğal etməkdə, erməni əsirləri qeyri-qanuni saxlamaqda və s. suçlayıblar.
Dövlət katibi bu çağırışa necə reaksiya verəcək? Ermənipərəst Bayden dövründə də çoxsaylı qanun layihələri, bəyanatlar, qətnamələr irəli sürülürdü. Amma onların heç biri keçərli olmadı. Bəs ermənilər Tramp administrasiyasına niyə ümid edirlər? Üstəlik, az əvvəl İsrailin Begin-Sadat Strateji Araşdırmalar Mərkəzi “Azərbaycanı Trampın regional planlarına və İsrailin maraqlarına necə effektiv şəkildə cəlb etmək olar: praktik tövsiyələr” adlı xüsusi perspektiv hesabatında bu məsələyə toxunmuşdu. Orada bildirilirdi ki, “ABŞ və İsrail yeni "Böyük Yaxın Şərq" arxitekturası çərçivəsində Azərbaycanın üstünlüklərindən tam şəkildə istifadə edə bilməsi üçün 907-ci maddə ləğv edilməlidir".
Qeyd edək ki, “907-ci düzəliş” 1992-ci ildə ABŞ Konqresi tərəfindən “Azadlığa dəstək haqqında” akta əlavə edilən və Azərbaycana ABŞ-ın birbaşa dövlət yardımını qadağan edən düzəlişdir. Erməni lobbisinin təşəbbüsü ilə qəbul edilib. Bu qadağa Azərbaycanı iqtisadi və siyasi sabitliyi asanlaşdırmaq üçün ABŞ hökumətindən birbaşa yardım almayan yeganə postsovet dövlətinə çevirib. Senat 24 oktyabr 2001-ci ildə akta ABŞ Prezidentinə “907-ci düzəliş”dən imtina etmək imkanını təmin edən düzəlişi qəbul edib. Azərbaycan Baydenin dövründə “907-ci düzəliş”in müddətinin əsassız şəkildə artırılması və qərəzli yanaşmalarla üzləşib. ABŞ-da yeni siyasi hakimiyyətin fəaliyyətə başlaması bu əsassız düzəlişin də ləğv edilməsi ilə bağlı ümidlər yaradır. Ancaq ermənipərəst konqresmenlər də bir yandan dinc oturmurlar...
“Yeni Müsavat”a danışan Demokratiya və İnsan Hüquqları Komitəsinin sədri Çingiz Qənizadə qeyd etdi ki, Azərbaycan hərbi arsenalını postmüharibə dövründə də gücləndirir və bədxahların qəbul etdiyi “907-ci düzəliş” artıq bizim qarşımızı kəsə bilməz. Onun sözlərinə görə, Azərbaycan bu sanksiyanın tətbiq edilməsinə baxmayaraq, 30 ildən çox müddətdə hərbi potensialını artıraraq torpaqlarını işğaldan azad etməyi bacarıb: “Bu baxımdan, Azərbaycana edilən ədalətsizliyə biz layiqli cavab vermişik. Ermənistana hamilik edənlərin isə cəhdləri puça çıxdı və bu gün də iflasa uğramaqdadır. Əslində ABŞ sülh sazişinin imzalanmasını dəstəkləyirsə, bu köhnə və lüzumsuz düzəlişi tamamilə ləğv etməlidir. Biz Tramp hakimiyyətindən belə bir addım gözləyirik. Necə ki, Ağ Ev rəhbəri lazımsız qurumların ləğvinə qərar verir, bu addımı atması da məntiqli olardı”.
Çingiz Qənizadə
Ç.Qənizadə vurğuladı ki, konqresmenlərin çağırışı cavabsız qalacaq: “Onlar erməni lobbisinə xidmət edirlər. Ona görə də aldıqları pulun əvəzini ödəyirlər. Bununla nəsə iş gördüklərini erməni lobbisinə sübut etmək istəyirlər. O ki qaldı erməni hərbi caniləri ilə bağlı deyilənlərə, bu da siyasi kampaniyanın bir hissəsidir. Biz ABŞ konqresmenlərini Bakıdakı məhkəməni izləməyə dəvət edirik. Onlar gəlib bu cinayətkarların etirafları ilə tanış olduqdan sonra danışsınlar. Əfsus ki, Amerika Konqresində hətta Araik kimi qatillərə, müharibə cinayətləri törətmiş şəxslərə sahib çıxanlar da var imiş. Bu, biabırçılıqdır. Konqres kimi mötəbər tribunadan Qarabağda separatçılıq, qanunsuzluq, cinayətkar əməllərlə məşğul olmuş şəxslərin müdafiə edilməsi Amerikaya başucalığı gətirmir”.
Ç.Qənizadə onu da dedi ki, Azərbaycan belə çağırışlara hazır olmalıdır: “Dövlət katibi Rubio bu günlərdə Bakı ilə İrəvanın sülh mətnini razılaşdırmasını alqışladı. İnanmıram ki, konqresmenlərin əsassız bəyanatlarına səs vermiş olsun. Ümumiyyətlə, Tramp komandasının gündəmində hələ ki bölgəmizlə bağlı məsələlər yoxdur. Onlar Qrelandiya, Kanada, Ukrayna münaqişəsi ilə bağlı mövzuları prioritet hesab edirlər. O səbəbdən, konqresmenlər özü deyib özü eşidəcək. Hətta Bayden kimi "907-ci düzəliş"in müəllifi onlara o dərəcədə dəstək olmadı".
Yada salaq ki, bu ilin yanvarında da ABŞ-dakı erməni diasporu təcili toplantı keçirərək, Bakıda xunta rejiminin mühakimə edilən rəhbərlərinin məhkəməsi ilə bağlı tərəfdarlarına müraciət göndərmişdi. Onlar iddia edirdilər ki, guya Azərbaycanda ədalətli məhkəmə keçirilə bilməz və həmin canilər azad edilməli, başqa bir ölkəyə ekstradisiya olunmalıdırlar. Həmin müraciətə “Sosialist İnternasionalı”, ABŞ Konqresinin Ermənilərlə İş üzrə Komitəsinin həmsədri Frenk Pallone, həmin komitənin üzvü Dina Titus, Avropa Parlamentinin Sosial-Demokrat Siyasi Qrupunun sədr müavini Yannis Manyatis və eyni siyasi qrupun üzvü Naço Amor Sançez qoşulmuşdular.
Emil SALAMOĞLU,
“Yeni Müsavat”
XƏBƏR LENTİ
03 Aprel 2025
ŞƏRHLƏRŞƏRH YAZ