Nizami rayonu, Qara Qarayev prospektində piyadanı maşınla vuraraq ölümünə səbəb ola sürücü məhkəmə zalında həbs edilib.

Musavat.com xəbər verir ki, təqsirləndirilən şəxs mərhumun ailə üzvləri ilə barışa bilməyib.

Bildirək ki, Quliyev Elmar Elnur oğlu idarə etdiyi "Chevrolet Cruze" markalı avtomobillə "Xalqlar Dostluğu" metrostansiyasından "Neftçilər" metrostansiyası istiqamətində hərəkətdə olarkən piyada 1964-cü il təvəllüdlü Qəhrəmanov Rafiq Rəmzi oğlunu vurub.

Hadisə nəticəsində piyada aldığı xəsarətlərdən Kliniki Tibbi Mərkəzdə ölüb.

Qəzaya səbəb sürücünün yolun sağ hissəsindən ötmə əməliyyatı edən zaman piyadanı gec görməsi olub.

Elmar Quliyev əməlinə görə peşman olduğunu deyib. Bildirib ki, ilk dəfədir cinayət əməli törədir. O, mərhumun ailə üzvləri ilə barışıq əldə edə bilmədiyini, dəfələrlə cəhd etsə də qovulduğunu deyib.

Mərhumun hüquqi varisi olan xanımı təqsirləndirilən şəxsdən şikayətçi olduğunu deyib. Bildirib ki, yas mərasimində onlara heç bir köməklik göstərilməyib. Hüquqi varis bildirib ki, dəymiş maddi və mənəvi ziyana görə mülki iddia qaldıracaq.

Məhkəmə Elmar Quliyevi təqsirli bilərək 5 il 3 ay müddətinə azadlıqdan məhrum edib. Barəsində seçilmiş polis nəzarətinə verilmə qətimkan tədbiri dəyişirilib və məhkəmə zalında həbs edilib.

İ.Muradov
Musavat.com