Yeniyetməlik dövründə sürətlə artan piylənmə təkcə artıq çəki ilə məhdudlaşmır, eyni zamanda xərçəng və digər xroniki xəstəliklərin riskini də ciddi şəkildə artırır. Mütəxəssislər vurğulayırlar ki, sağlam gələcək üçün erkən yaşlardan ehtiyat tədbirləri görmək həyati əhəmiyyət daşıyır.

Türkiyənin səhiyyə nazirinin müavini Dr. Şuayıp Birinci Türkiyədə yeniyetmələrin 30 faizinin artıq çəkidən əziyyət çəkdiyini bildirib. Onun sözlərinə görə, "yeniyetməlik çağında obez olanların 80 faizində ən azı bir xroniki xəstəlik müşahidə olunur və bu, xərçəngə qarşı həssaslığı əhəmiyyətli dərəcədə artır".

Səhiyyə sisteminin davamlılığı üçün maarifləndirmə vacibdir

Əhalinin yaşlanması ilə xroniki xəstəliklərin də artdığını deyən Dr. Birinci, 65 yaşdan yuxarı şəxslərin 54 faizində dörd və ya daha çox xəstəlik olduğunu bildirib. Bu vəziyyət səhiyyə sisteminə yükü artırır və fərdlərin öz sağlamlıqlarına məsuliyyətlə yanaşmalarını zəruri edir. O vurğulayıb ki, profilaktik sağlamlıq tədbirləri uzunmüddətli perspektivdə həm fərdi, həm də ictimai səviyyədə ciddi iqtisadi üstünlüklər yaradır.

Sağlamlıq uşaq yaşlarından formalaşmalıdır

Piylənmənin demək olar ki, bütün xəstəliklərin başlanğıc nöqtəsi olduğunu bildirən Birinci, sağlam qidalanma, fiziki aktivlik və şüurlu həyat tərzinin uşaqlıqdan aşılanmasının vacibliyini qeyd edib. “Bu gün sağlamlığa xərclədiyimiz hər dollar gələcəkdə 40 dollar qənaət deməkdir”, – deyə o bildirib.

Cəmiyyətin sağlamlıq savadlılığının artırılması və erkən yaşlardan maarifləndirmə, sağlam gələcəyin əsasını təşkil edir.//E-saglam.az