ABŞ və İsrail İslam Respublikasını hərbi güclə hədələməyə davam edərsə, İran Beynəlxalq Atom Enerjisi Agentliyi (BAEA) ilə əməkdaşlığı dayandıracaq və bütün agentlik müfəttişlərini ölkədən qovacaq.

Musavat.com TASS-a istinadən xəbər verir ki, bunu İranın ali lideri Ayətullah Əli Xameneinin siyasi məsələlər üzrə müşaviri, İslam İnqilabı Keşikçiləri Korpusunun generalı Əli Şəmxani deyib.

"Davamlı xarici təhdidlər və İrana hərbi hücum həyata keçirmək cəhdləri Beynəlxalq Atom Enerjisi Agentliyinin müfəttişlərin qovulması və onunla əməkdaşlığın dayandırılması kimi çəkindirici tədbirlərin tətbiqinə səbəb ola bilər. Digər tədbir zənginləşdirilmiş uranın İran daxilində təhlükəsiz və naməlum yerlərə daşınması ola bilər" – o "X" sosial şəbəkəsində yazıb, "Tramp" və "İsrail" haştaqlarını əlavə edib.

Martın 7-də ABŞ prezidenti Donald Tramp Xameneiyə nüvə proqramı üzrə danışıqların aparılmasını təklif edən mesaj göndərdiyini açıqlayıb. Tehran birbaşa dialoqdan imtina etsə də, vasitəçilər vasitəsilə danışıqların davam etməsi ehtimalını nəzərdən keçirib.

Martın 30-da Tramp nüvə danışıqlarının nəticəsiz qalacağı təqdirdə iki həftə ərzində İrana əlavə rüsumlar tətbiq edəcəyini bildirib. O, həmçinin sazişdən tamamilə imtina ediləcəyi təqdirdə İslam Respublikasını görünməmiş bombardmanlarla hədələyib. Cavabında Xamenei qeyd edib ki, o, ABŞ-ın hərbi müdaxiləsi ehtimalına inanmır, lakin xəbərdarlıq edib ki, Vaşinqtonun İranda iğtişaş törətmək cəhdinə qəti cavab veriləcək. Aprelin 7-də yəhudi dövlətinin müdafiə naziri İsrael Kats bildirib ki, İsrail İranın nüvə silahı əldə etməməsi üçün əlindən gələni edəcək.

Aprelin 12-də Omanda ABŞ və İran nümayəndələrinin görüşü keçiriləcək və orada İranın nüvə proqramı ətrafında vəziyyətin nizamlanması parametrlərini müzakirə etməyi planlaşdırırlar.

Musavat.com