Serbiya Prezidenti Aleksandar Vuçiç İkinci Dünya müharibəsi zamanı Serbiyanın nasist işğalından əsasən öz gücü ilə azad edildiyini bildirib.

Musavat.com xəbər verir ki, o, tanınmış bloger Mario Naufalla verdiyi müsahibədə Sovet İttifaqının köməyinin məhdud olduğunu vurğulayıb.

"Bəli, biz Qırmızı Ordudan müəyyən dəstək aldıq, amma əsas yük Serbiya ordusunun üzərinə düşdü. Yardım məhdud idi, biz öz torpaqlarımız uğrunda özümüz döyüşdük," – deyə Vuçiç qeyd edib.

Serbiya lideri həmin dövrdə baş verənləri serb xalqına qarşı soyqırım kimi qiymətləndirib. Onun sözlərinə görə, İkinci Dünya müharibəsi illərində Serbiya xalqı ağır itkilər verib və bu hadisələr ölkənin tarixi yaddaşında dərin izlər buraxıb.

Xatırladaq ki, İkinci Dünya müharibəsi zamanı Yuqoslaviya 1941-ci ildə nasist Almaniyası tərəfindən işğal edilmişdi. Daha sonra partizan hərəkatı geniş vüsət almış, ölkədə Almaniya və onun müttəfiqlərinə qarşı silahlı müqavimət güclənmişdi. 1944-cü ilin payızında Sovet qoşunları Belqrada daxil olmuş, lakin Vuçiçin sözlərinə görə, azadlıq əsasən yerli müqavimət qüvvələrinin hesabına əldə edilib.

Prezidentin bu açıqlaması beynəlxalq mediada geniş müzakirələrə səbəb olub. Tarixçilər və ekspertlər Vuçiçin mövqeyini şərh edərək, Qırmızı Ordunun rolunun azaldılmasının Sovet tarixinin yenidən yazılması cəhdi olub-olmadığını sual edirlər.


Musavat.com