2024-cü ilin iyun-sentyabr aylarında Türkiyədən Rusiyaya turist axını 2023-cü ilin eyni dövrü ilə müqayisədə 80 faiz artaraq 50 min nəfərə çatıb.

Musavat.com xəbər verir ki, məlumatı Rusiya İqtisadi İnkişaf Nazirliyi açıqlayıb.

Məlumata əsasən, yayda Rusiyadan Türkiyəyə turist axını 2023-cü ilin eyni dövrü ilə müqayisədə 7 faiz artaraq 2,5 milyon nəfərdən çox olub.

Rusiyanın iqtisadi inkişaf nazirinin müavini, turizm üzrə Rusiya-Türkiyə işçi qrupunun həmsədri Vladimir İliçev qeyd edib ki, Rusiya Türkiyədən gələn turistlərin sayının artması üçün şərait yaratmaqda maraqlıdır.

Onun sözlərinə görə, bunun üçün ilkin şərtlər var - ölkədə ümumi turist axınının 35 faizini təşkil edən elektron viza mexanizmi var və müntəzəm birbaşa uçuşlar inkişaf etdirilib. Eyni zamanda müsəlman ölkələrindən gələn turistlər üçün rahat şəraitin yaradılmasına xüsusi diqqət yetirilir. Rusiyanın müxtəlif regionlarında mehmanxanalar və işçilər müsəlman dostu və halal standartlarına uyğunluq sertifikatına malikdirlər. Rusiya da öz turizm məhsullarını Türkiyə bazarında tanıtmaq üçün fəal işə başlayıb.

Musavat.com