ABŞ prezidenti Donald Trampın Milli Təhlükəsizlik Şurasının (MTŞ) üzvləri, o cümlədən Voltz dövlət işlərini şəxsi Gmail hesabları vasitəsilə aparıb.

Musavat.com xəbər verir ki, bu barədə The Washington Post məlumat yayıb. 

Bildirilir ki, bu üsul Signal kimi şifrəli mesajlaşma proqramlarından daha az təhlükəsiz hesab edilir və yüksək vəzifəli təhlükəsizlik rəsmilərinin məlumat qoruma təcrübələri ilə bağlı ciddi suallar doğurur.

Nəşrin əldə etdiyi elektron məktublara əsasən, Voltzun baş köməkçisi Gmail vasitəsilə digər hökumət agentliklərinin rəsmiləri ilə yüksək texnologiyalı hərbi və silah sistemləri barədə danışıqlar aparıb. Hökumət nümayəndələrinin rəsmi hesablar istifadə etdiyi halda, MTŞ əməkdaşı şəxsi e-poçt ünvanına üstünlük verib.

Qəzet yazır ki, Voltz Gmail hesabına birbaşa məxfi məlumatlar almasada, potensial istismar edilə biləcək iş qrafiki və digər rəsmi sənədləri əldə edib. Bəzi hallarda o, iş qrafikindən mətnləri Signal-a köçürərək görüşlərin və müzakirələrin koordinasiyasını həyata keçirib.

Ekspertlər bildirirlər ki, şəxsi e-poçtun, hətta məxfi olmayan sənədlər üçün istifadəsi risklidir, çünki xarici kəşfiyyat orqanları yüksək rütbəli dövlət məmurlarının ünsiyyətlərinə və iş cədvəllərinə xüsusi önəm verirlər.

Milli Təhlükəsizlik Şurasının sözçüsü Brayan Hyuz isə bildirib ki, Voltzun şəxsi e-poçtdan istifadə etdiyinə dair sübut görməyib. O əlavə edib ki, Voltz “köhnə əlaqələrdən” işlə bağlı mesajlar alsa da, federal qanunlara uyğun olaraq həmin məktubların surətini hökumət e-poçtuna göndərib.

"Voltz məxfi məlumatları şəxsi e-poçt vasitəsilə göndərməyib və göndərməyəcək", – deyə Hyuz vurğulayıb.

Bununla yanaşı, Voltzun köməkçisinin Gmail vasitəsilə mühüm hərbi məsələləri müzakirə etməsi ilə bağlı suala cavab olaraq Hyuz bildirib ki, MTŞ əməkdaşlarına yalnız təhlükəsiz platformalardan istifadə etmələri ilə bağlı göstərişlər verilib.

 

Musavat.com