Tanınmış memar, sənətşünaslıq üzrə elmlər doktoru Elçin Əliyev kibertalamaya məruz qalıb və 5 min manat pulu hesabından oğurlanıb.  

Musavat.com xəbər verir ki, bu haqda Elçin Əliyev özünün sosial şəbəkə hesabında məlumat verib, bankların kibertalamalarla bağlı konkret fəaliyyət planının olmamasından şikayətlənib.

Elçin Əliyev yazır: 

-Ötən aylarda Azərbaycan Beynəlxalq Bankının Mərkəzi Filialındakı hesablarla bağlı bir neçə xoşagəlməz əhvalatla üzləşmişəm. Birincisi, aprel ayında fırıldaqçılar mənim bütün bank hesablarımı “sıfırladılar” və 5 min manata yaxın əmanəti oğurladılar. Bu şok hadisədən sonra mən rekvizitlərimi və kartlarımı dəyişdirdim. Bir ay əvvəl məni aldadıb 80 manatımı taladılar.

Və bu gecə kimsə yenidən hesablarımı sındırmağa cəhd etdi və bank onları avtomatik blokladı. Əla. Beləliklə, səhər iş əvəzinə banka getdim. Təəssüf ki, ağrılı durumla üzləşdim: işçilər çaşqın durumda idi, heç kim nə edəcəyini bilmir, hamı nə edəcəyini bir-birindən soruşur. Bir az gözlədikdən sonra əsəbi halda soruşuram ki, “axı, yəqin ki, belə hallar hər gün olur, doğrudanmı hazır fəaliyyət protokolu yoxdur, niyə nə edəcəyinizi bilmirsiniz?” Sükut...

Düşündükdən və məsləhətləşdikdən sonra yenidən bütün hesabları və kartları dəyişdirməyi təklif etdilər. Belə bir cavabı bir neçə ay əvvəl, apreldə də almışdım, həqiqətən başqa, daha kəskin həll yolu yoxdur? Axı onlar sadəcə mənim mobil tətbiqimə “daxil olmaq” istəyirdilər... Ona görə ki, hesabların və kartların dəyişdirilməsi uzun prosesdir.

Buna görə də, sonda biz birlikdə qərar verdik ki, sadəcə bloklanmış kartların açılması ilə bağlı bəyanat yazacağam  və məktubun məzmunu ilə bağlı ikinci macəralar seriyası başladı.

Birincisi, xeyli mübahisə etdikdən sonra ərizədə “Mobil tətbiq ilə bağlı bütün məsuliyyət mənimdir” ifadəsini yazmağa məcbur oldum. Halbuki, belə də aydındır ki, bütün məsuliyyət mənimdir, daha bunu yazmağa nə ehtiyac var?  ABB-nin Mərkəzi Filialının sədr müavini Anar Mirzəyev mən dəhlizdə bu ifadəni əlavə etmək məcburiyyətində qalana qədər ərizəni qətiyyətlə qəbul etmədi: “Baş verəcək bütün riskləri öz üzərimə götürürəm”.

Təsəvvür edirsən?! Belə çıxır ki, mən həm bankdakı puluma, həm də kartlarıma görə tam məsuliyyət daşıyıram - və bank sadəcə məndən vəsait qəbul edir, seyfində (cibində) saxlayır və qazanc əldə edir. Bəs onlar nəyə görə məsuliyyət daşıyırlar?!

Kiçik bir kənarlaşma:

mənə elə gəlir ki, (bəlkə də səhv edirəm - bank sektorundan uzaq bir memarın fərziyyələri) Rusiya-Ukrayna münaqişəsi ilə əlaqədar ölkəyə bir çox gənc ağıllı oğlanlar gəldi, onlar müəyyən müddətdən sonra Bakıda yaşayarkən bank sektorumuzun geridə qaldığını gördü - axı biz ancaq “mətbuat”da bir-birimizi tərifləyib qondarma pozitiv yazılar sifariş edə bilərik. Və təbii ki, bəzi vicdansız qonaqlar bundan istifadə etmək qərarına gəldilər - dostlarla söhbətlərdə gəldiyimiz qənaətə görə son bir ildə bu sahədə çoxlu cinayətlərin artmasının səbəbkarı onlardır. 

Bəs yerli banklar? Vəziyyəti daha yaxşı başa düşmək üçün səhər tezdən, iş gününün başlamazdan əvvəl (və mən həmişə banka bu vaxt, açılışdan 5-10 dəqiqə əvvəl gəlirəm - mənim üçün daha əlverişlidir) nə olduğunu görməyi məsləhət görürəm. ABB Mərkəzi Filialının gənc əməkdaşları, müştərilərə xidmət göstərən kiçik məmurlar. Bahalı lüks avtomobillərin tam paradı - hətta mən, kifayət qədər uğurlu 56 yaşlı memar, belə lüks avtomobilə sahiblənə bilmərəm. Bu durum özü nədən danışır?

Korrupsiya odur ki, öz işini həqiqətən bilən və sevən mütəxəssislər bir çox özəl və dövlət təşkilatlardan kənar qalırlar, onları ən yaxşı halda heç nə bilməyən, dünənki 3 alanlar tutur. Bunlar “böyük yoldaşlar”ın oğul və qızlarıdır. Məhz buna görə də banklarda standart situasiyalarda necə davranmağı – hər hansı primitiv səbəbdən hesabları dəyişməməyi bilən əsl peşəkarlar yoxdur. Ona görə də pulumuzu və maliyyə bazarımızı qoruyan yoxdur. Buna görə də məni bu gün yazmağa məcbur etdilər ki, mən bankdakı vəsaitlərimə görə cavabdehəm - çünki onları necə qorumaq barədə kifayət qədər məlumatım yoxdur!

Ona görə də qonaqlar bizə zəif inkişaf etmiş kimi baxır və cəzasızlıqla bizi soyurlar - korrupsiya ucbatından heç nə bilməyən və əsas işimizi görə bilməyənlər kimi baxırlar.

Bu sizə tanış deyil?

Elçin Əliyev bankda üzləşdiyi tualet problemi haqda da fikirlərini yazıb: “Belə çıxır ki, bir neçə il ərzində əsaslı təmirdən sonra təzəcə istifadəyə verilən binada müştərilər üçün ümumiyyətlə, tualet yoxdur – biz onlar üçün kimik, öz pulumuzla bu adamlara həyatdan həzz almalarına mane oluruq...”

 

E.MƏMMƏDƏLİYEV,
Musavat.com