“Taliban” hökumətinin Əxlaqın təbliği və əxlaqsızlığın qarşısının alınması nazirliyi yerli mediada canlı məxluqların şəkillərinin yayımını qadağan edir.

Musavat.com Amu.tv-yə istinadən xəbər verir ki, oxşar qadağa Əfqanıstanın beş vilayətində artıq qüvvədədir.

Yerli jurnalistlər ötən həftə “Milli zəfəran” festivalı da daxil olmaqla, son bir neçə tədbir zamanı “Taliban”çıların öz əxlaqi prinsiplərini qorumaq zərurətini əsas gətirərək foto və video çəkilişlərinə mane olduqlarını bildirdilər.

Bununla belə, digər yerli “Taliban” rəsmilərinin daha yumşaq mövqe tutduğu görünür. Son bir nümunədə Herat qubernatorunun müavini Mohacir Farahi qanunun tətbiqi ilə bağlı uyğunsuzluqları vurğulayaraq medianın kamerasına müsahibə verib.

Heratda Fəziləti təbliğat nazirliyinin rəhbəri Əziz-ur-Rahman Mohacirin “Taliban”ın əxlaq kodeksinin canlı varlıqların şəkillərinin yayımını qadağan edən 17-ci maddəsinin tətbiqi üçün təşəbbüslərə rəhbərlik etdiyi bildirilir.

Bəzi jurnalistlər bu cür məhdudiyyətlərin media azadlığına və cəmiyyətə təsirindən narahat olduqlarını bildiriblər.

Jurnalist Mustafa Şəhriyar bu barədə danışaraq deyib: “Səs və görüntü cəmiyyətin həqiqətini əks etdirir. Onları aradan qaldırsaq, Əfqanıstanın səsi susacaq və heç kim xalqımıza qarşı edilən haqsızlıqlar və ya məhdudiyyətlər barədə eşitməyəcək”.

Sentyabr ayından bəri “Taliban” beş əyalətdə oxşar qadağalar tətbiq edib: Qəndəhar, Maydan Vardak, Taxar, Badqis və Nangarhar.

Qadağalar “Taliban”ın İslam qanununun sərt şərhini həyata keçirmək üçün artan səyləri əks etdirir.

“Belə məhdudiyyətlər informasiya axınını ciddi şəkildə məhdudlaşdırır və mövcud rejimin söz azadlığına nəzarəti itirmək qorxusunu əks etdirir”, – Jurnalistlərə dəstək təşkilatının sədr müavini Bəsir Əhməd Danişyar bildirib.

Musavat.com