1 ilə yaxındır ki, Bakı Ağır Cinayətlər Məhkəməsində "Urmedhelp" və "My Doc Tour" adlı şirkətlərin sahibi Nuridə Seyidova və digər 2 nəfər – Aynur Bayramova ilə Aysel Məmmədovanın cinayət işi üzrə məhkəmə prosesi davam edir.

Ötən müddət ərzində məhkəmədə zərərçəkənlərin yarısı dindirilib. Prosesin uzanmasının səbəblərindən biri də iş üzrə hakimlər heyətində tez-tez dəyişikliklərin olmasıdır.

Prosesə hakim Azad Məcidovun sədrliyi ilə baxıılır. Hakimlər heyətinə Roman Ələkbərli və Səbinə Məmmədzadə daxildir.

Musavat.com-a daxil olan məlumata görə, hakim Səbinə Məmmədzadə də uzunmüddətli məzuniyyətə gedib.

Bu səbəbdən proses tərkibə yeni hakim daxil edilənə kimi qeyri-müəyyən vaxta qədər təxirə salınıb.

Xatırladaq ki, "Talassemiya işi" məhkəməyə daxil olandan sonra Azad Məcidovun icraatına verilmişdi.

O zaman tərkibdə Səbinə Məmmədzadə ilə yanaşı, hakim Əli Məmmədov da vardı. Sonradan Əli Məmmədov Bakı Apellyasiya Məhkəməsinə təyinat aldı. Onu Gəncə Ağır Cinayətlər Məhkəməsinin hakimi Roman Ələkbərli əvəzləmişdi.

Məsələ burasındadır ki, prosesə sədrlik edən Azad Məcidovun da yaş həddi ilə əlaqədar yaxın vaxtlarda təqaüdə göndərilməsi gözlənilir. Hətta bu mövzu ötən ilin dekabrında keçirilən prosesdə müzakirə mövzusu da olmuşdu. Sədrlik edən Azad Məcidov onun təqaüdə getməsini gözləyən müttəhimlərə sərt reaksiya vermişdi.

"Mən belə başa düşürəm ki, təqsirləndirilən şəxslər bu işi süni yolla uzatmaq üçün hər şeyi edir. Təqsirləndirilən Aynur Bayramova dünən axşam saat 11-də özünü narahat hiss etdiyini bildirib və Penitensiar xidmətin müalicə müəssisəsinə aparılıb. Buna görə də hazırda prosesdə iştirak etmir. Onun daha öncə prosesdə də ürəyi getmişdi. Amma bu kimi hərəkətlər ədalətli qərarın verilməsinin qarşısını ala bilməyəcək.

Başa düşürəm ki, prosesə uzaqdan gələnlər var. Onlar nəzərə alınacaqlar. Təqsirləndirilən şəxslər düşünürlər ki, mən təqaüdə göndərilsəm, yerimə prosesə sədrlik etmək üçün hansısa təcrübəsiz hakim təyin edərlər. Amma unutmasınlar ki, məhkəmədə təcrübəsiz hakim yoxdur.

Ümumiyyətlə, bu cinayət işi yekunlaşanadək prosesdə hakim olacam. Məhkəmənin qərarı tam obyektiv olacaq" - deyə Azad Məcidov kəskin reaksiya vermişdi.

İş üzrə 36 nəfər zərərçəkən var.

Vətəndaşlar uşaqlarının mübtəla olduqları ağır qan xərçəngindən qurtulmaları üçün çıxış yolu axtararkən müalicə üçün topladıqları pullar da əllərindən çıxarılıb. Nəticədə müalicəsizlikdən ölən körpələr də var.

Bu, son dərəcə qansızlığı ilə diqqət çəkən dələduzluq işi üzrə ümumilikdə 1 milyon manata yaxın qan, müalicə pulu mənimsənilib. Bu qalmaqallı məhkəmə prosesi aylardır ki, davam edir. Son proses də zərərçəkmişlərin dindirilməsi ilə davam etdirilib.

Ötən prosesdə zərərçəkmiş qismində Aynur Orucova ifadə verib. Bildirib ki, təqsirləndirilən Aynur Bayramova və Nuridə Seyidovanı tanıyıb.

Onun sözlərinə görə, oğlu talassemiya xəstəsi olub:

"Bu şəxslərlə Günel Heydərova vasitəsi ilə tanış oldum. Günel xanım da bunların yanına xəstə aparmışdı. Günel xanım əməliyyat üçün məndən 20 min manat istədi. O qədər pulumuz yox idi. Pulu toplayıb onların ofisinə getdik, bizi çox yaxşı qarşıladılar. Aynurun öz uşağı da xəstə idi. Bizdə 25 min manat var idi, yataqxana tipli evimizi satmışdıq. Amma pulu hələ almamışdıq. Aynur zəng etdi ki, pulu gətirin. Özü də pulu dollarla istədilər. Biz də pulu 15 min dollara çevirdik və "Çinar Plaza"da onlara verdik. Bizi İstanbula göndərdilər. Biletimizi də Nuridə təşkil etdi. Bizi hotelə yerləşdirdilər.

Səhəri gün xəstəxanaya getdik, analizləri verdik. 3500 dollar istədilər. Mən də vəziyyəti Aynura dedim, analiz məsələsi həll edildi. Dedilər ki, hər şey hazırdır, pul köçürülsün, əməliyyat olunacaq. Həmin vaxt uşağın səhhətində problem yarandı. Xəstələndiyi üçün əməliyyata qəbul etmədilər. Mən də Nuridəyə zəng etdim, dedim ki, uşaq xəstələndiyi üçün xəstəxanaya qəbul etmirlər, pulu köçürmək lazımdır. Amma bir həftə iki, sonra üç həftə oldu, pulu köçürmədilər".

Aynur Orucova qeyd edib ki, sonradan Nuridə Seyidova onları Antalyada olan xəstəxanaya göndərmək istəyib, amma buna özü razı olmayıb:

"Çünki uşağın halı yaxşı deyildi, bundan sonra Azərbaycana qayıtdıq. Uşaq da əməliyyat olunmadı".

Zərərçəkmiş bildirib ki, hazırda ona dəymiş ziyanı həm Nuridə Seyidovadan, həm də Aynur Bayramovadan tələb edir. O bildirib ki, pulu Nuridə Seyidovaya verib:

"O da işçisi Toğrula verdi. Pul sayıldı. Pulun alınması ilə bağlı aramızda müqavilə də imzalandı".

Aynur Orucova deyib ki, İstanbulda olduqları vaxt 10 min dollar əlavə xərcləri çıxıb:

"Nuridə dedi ki, bir həftəyə pulu qaytaracaqlar. Amma sonra zəng etdik, ona zəng çatmadı. İnternetdən öyrəndik ki, Nuridə nəzarətə götürülüb. Mən bunlara çox inanmışdım. Çünki oturub söhbət etmişdik, dərdləşmişdik".

Təqsirləndirilən Aynur Bayramova bildirib ki, pulun alınmasında iştirak etməyib:

"Pulu verəndə mən orada idim? Dəqiq fikirləşin. İkimizin də dərdimiz eynidir".

Zərərçəkmiş ona cavab verməyib. Aynur Bayramova əlavə edib ki, pulların alınması zamanı orada olmayıb, Aynur Orucovanı bir dəfə söhbət etməyə gələndə, bir dəfə də aeroportda görüb.

Prosesdə zərərçəkmişlər Zeynal Cəlilov və Nüşabə Məmmədovanın məhkəməyə göndərdikləri məktublar elan olunub. Zeynal Cəlilovun Aysel Məmmədovadan 25 min dollar, Nüşabə Məmmədovanın isə 34 min dollarlıq ziyanı Nuridə Seyidova və Aynur Bayramovadan tələb etdikləri məlum olub.

Daha sonra təqsirləndirilən Nuridə Seyidova iddia edib ki, digər təqsirləndirilən Aynur Bayramovanın zalda əyləşən bacısı tərəfindən təhqirlərə məruz qalır.

"Hörmətli hakim, bizi zalda lənətləyirlər, bundan təngə gəlmişəm", - deyə Seyidova qeyd edib.

Aynur Bayramova isə Nuridə Seyidova tərəfindən hədə-qorxu aldığını söyləyib. Hakim Aynur Bayramovanın bacısına xəbərdarlıq edib və onun zaldan çıxarılmasına göstəriş verib.

Prosesdə tərəflər arasında mübahisə yaranıb. Hakimlər iclasda qısa fasilə elan ediblər. Ara sakitləşəndən sonra proses davam edib.

Şahid qismində Mais Bayramovun dindirilməsi zamanı yenidən mübahisə yaranıb. Bu, hakimin etirazına səbəb olub:

"Mən 43 ildir bu sahədə işləyirəm. İmkan verin, işimizi aparaq. Belə getsə, işi apara bilməyəcəyik. Prosesi uzatmaq lazım deyil. Əks halda, müvafiq tədbir görəcəyik".

Daha sonra şahid Mais Bayramov təqsirləndirilən Aysel Məmmədovanın suallarını cavablandırıb. M.Bayramov deyib ki, xalası oğlu Ramin Dadaşovun övladının xəstəliyi ilə bağlı Talassemiya Mərkəzində olub və təqsirləndirilən şəxsləri o zaman tanıyıb. Bildirib ki, özü də bu işdə zərərçəkəndir.

Şahid qismində ifadə verən Şəbnəm Qurbanovanın sözlərinə görə, Nuridə Seyidova və Aynur Bayramovanı əvvəldən tanıyırmış:

"Aysel Məmmədovanı isə 2017-ci ildə mən "Nərgiz" fonduna aid tibbi şirkətlərin birində vəzifədə olarkən tanıdım. Mənim övladım da talassemiya xəstəsi idi, Talassemiya Mərkəzində əməliyyat olunmuşdu. Lakin müalicəyə pul çatdırmırdıq. O ərəfədə sosial şəbəkələrdə Aysel Məmmədovanın elanını görüb, ondan kömək istədim. Dedi ki, yalnız əməliyyata kömək edə bilər.

Aysel Məmmədova şəxsi hesabına mənə kömək etdi. Onların yanına fonddan tanıdığım 2 nəfər talessemiya xəstəsinin valideynini göndərmişdim. Həmin valideynlər ödəniş edərkən orada olmamışam. Aysel Məmmədova mənə əziyyətimin qarşılığı olaraq 1000 dollar vermişdi. Həmin pulu da müstəntiq məndən alıb zərərçəkən Nərgiz və Şövkət arasında bölüşdürdü".

İttihama görə, talassemiyalı xəstələrin valideynlərinin Daxili İşlər Nazirliyinə müraciətindən sonra ötən ilin fevralında cinayət işi başlanılıb.

Müəyyən edilib ki, Nuridə Seyidova digərləri ilə əlbir olaraq 36 talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib.

Qeyd olunub ki, övladı qan xəstəliyindən əziyyət çəkən bir neçə valideyn Nuridə Seyidovaya ümumulikdə 67 min dollar veriblər. Nuridə Seyidova valideynlərə söz verib ki, sənədlər hazırlanandan sonra azyaşlı xəstələri Türkiyənin Antalya şəhərindəki "Antalya Medical Park" hospitala yollayacaq. Pulu alsa da, vədinə əməl etməyib.

Bundan başqa, Nuridə Seyidova yalandan bildirib ki, Şəkinin Cumakənd kənd sakini Vüqar İsayevin talassemiyadan əziyyət çəkən qızı Gülbər İsayevanın ilik transplantasiyası üçün tələb olunan laborator müayinələr, donor xərci, cərrahi əməliyyat və digər xərcləri qarşılamaq üçün tələb olunan pulu sponsorlar ödəyəcəkdilər. Guya əməliyyata 70 min dollar tələb olunub, onun da 20 min dollarını "Çinar Plaza"da ofisdə Nuridə Seyidova ondan alıb, qalan məbləği isə yardım olaraq xaricdəki donor təşkilatların ödəyəcəyini vəd edib.

Sonra zərərçəkmişə məlum olub ki, ortada nə donor var, nə bir şey. Digər zərərçəkmiş Tural Nəsmiyev iki azyaşlı övladının müalicəsi üçün 2022-ci ilin mayında Nuridə Seyidovaya 35 min dollar verib. Nuridə Seyidova onun övladlarının Türkiyədəki Samsun şəhərində müalicə olunacağını bildirib. Həmin ilin oktyabrında Türkiyəyə gedib xəstəxanada gözləməyi tapşırıb. Tural Nəsmiyev 3 aydan çox həmin xəstəxanada qalsa da, nə donor, nə də əməliyyat olub. Hər dəfə Nuridə Seyidovayla əlaqə saxlayanda sonuncu ona səbrli olmağı məsləhət görüb. Nəhayət, aldadıldığını başa düşən Tural Nəsmiyev Türkiyədə keçirdiyi aylar ərzində xərclədiyi 8 min manat ziyanla geri dönüb.

İttiham aktında göstərilib ki, Nuridə Seyidova vətəndaşlardan pulları əsasən "Çinar Plaza"dakı ofisdə alıb. İstintaq zərərçəkən kimi 36 nəfəri müəyyən edib. Bunlar azyaşlı övladları talassemiyadan əziyyət çəkənlərdir.

Hakim dəyişikliyinə görə martın 12-nə təyin olunan prosesin baş tutmayacağı da gələn xəbərlər sırasındadır.

E.MƏMMƏDƏLİYEV,
Musavat.com