“Bir tərəfin dağıdıcı nəticə ilə qələbəsi regional nizamın gələcək strukturuna etibarsızlıq hissi yaradır”.

Musavat.com xəbər verir ki, bu iddianın müəllifi Moskva Beynəlxalq Münasibətlər İnstitutunun (MQİMO) müəllimi, ermənipərəst mövqeyi ilə seçilən Sergey Markedonovdur.

Markedonov Ermənistan və Azərbaycan arasında sülh sazişinin əldə edilməsinin nə dərəcədə mümkün və real olduğu barədə danışıb.

“BMT Baş Assambleyasının 79-cu sessiyası çərçivəsində Transqafqaz gündəliyi Azərbaycan və Ermənistan arasında sülh müqaviləsinin hazırlanması məsələsini daxil etməsəydi, natamam olardı. Nyu-Yorkda iki qonşu dövlətin xarici işlər nazirləri Ararat Mirzoyan və Ceyhun Bayramov arasında görüş keçirilib. Burada vacib bir məqam var: danışıqlar üzbəüz deyil, ABŞ dövlət katibi Antoni Blinkenin vasitəçiliyi ilə aparılıb.

Nyu-York görüşü güclü informasiya müşayiəti altında baş tutmadı. Qısa rəsmi açıqlamaya görə, Bakı və İrəvan nümayəndələri “sülhün və dövlətlərarası münasibətlərin bərqərar olması haqqında sazişin mümkün qədər tez bağlanması üçün əlavə səylər göstərməyə” razılaşıblar. Sanki əvvəllər eyni şeydə razılığa gəlməmişdilər”, - deyə Markedonov yazıb.

Onun sözlərinə görə, hər iki ölkənin ən yüksək nümayəndələri sülh sazişinin əvvəlkindən daha yaxın olması tezisini artıq min dəfə səsləndiriblər:

“Nikol Paşinyan hətta “əlimiz çatır” kimi metafora da işlədib. İlk baxışdan onunla mübahisə etmək çətindir, çünki Qarabağ problemi qapalı görünür. Hətta Ermənistan hakimiyyətinin özü də Azərbaycanın onun üzərindəki suverenliyini tanımağa hazırdır”.

“Ancaq praktikada uzadılmış qol metaforası fərqli görünür. Əksinə, biz üfüq xətti ilə məşğul oluruq. Ona yaxınlaşanda yenidən uzaqlaşır. Kim nə deyirsə desin, bir tərəfin dağıdıcı nəticə ilə qələbə qazanması regional nizamın gələcək strukturuna etibarsızlıq hissi yaradır. Rəsmi İrəvan bununla razılaşır. Bəs Ermənistan cəmiyyəti nə vaxta qədər onun güzəştlərini qəbul etməyə hazırdır? Üstəlik, Qarabağdan başqa, Qarabağ hissəsindən kənarda sərhədin müəyyənləşdirilməsindən tutmuş nəqliyyat kommunikasiyalarının açılmasına qədər bir çox problemlər var. Hətta konstitusiya əsasları da davam edən mübahisə predmetidir”, - deyə Markedonov qızışdırıcı və təxribatçı cümlələr işlədib.

Onun sözlərinə görə, nəticə eyni maksimalist yanaşmanı göstərir (yalnız indi top Bakının meydançasındadır, əvvəlki kimi İrəvanda deyil) və kənar oyunçular əvvəlki dövrlərdə olduğu kimi, ilk növbədə öz maraqlarını düşünürlər.

Musavat.com