Rusiya Donetsk vilayəti ətrafında əlavə qüvvələr toplayıb və genişmiqyaslı hücuma hazırlaşır.

Musavat.com UNİAN-a istinadən xəbər verir ki, bu barədə Müharibə Araşdırmaları İnstitutu (ISW) yeni hesabatında məlumat verib.

Hesabatda bildirilir ki, Rusiya qoşunları Limanın şimal-şərqindəki mövqelərini genişləndirir və Borova ilə Limanı ələ keçirmək üçün şərait yaradır.

Amerikalı analitiklər vurğulayırlar ki, Rusiya komandanlığı “insan dalğası” taktikası ilə Ukrayna qüvvələrini Jerebets çayının sol sahilindən sıxışdırmağa çalışır. Bununla belə, mexanikləşdirilmiş hücumların olmaması rusların texniki problemlərlə üzləşdiyini göstərir.

Ruslar Novolyubovkanın şimal-qərb istiqamətində irəliləyiblər və çox güman ki, bu yaşayış məntəqəsini ələ keçiriblər. Bundan əlavə, analitiklər Novodakı irəliləyişi də təsdiqləyiblər.

Ukrayna mənbələri isə rus qüvvələrinin Katerynivkanın cənub kənarına doğru hərəkət etdiyini qeyd edir. İlin əvvəlindən etibarən ruslar piyada hücumlarını artırıb və zirehli texnikadan nadir hallarda istifadə edirlər.

ISW-nin məlumatına görə, bəzi cəbhə bölgələrində qüvvələr nisbəti Rusiyanın xeyrinə 10:1 təşkil edir. Hücumun əsas qüvvələrini 144-cü və 3-cü motoatıcı diviziyalar təşkil edir. Eyni zamanda, ruslar itkiləri aktiv şəkildə kompensasiya edir, lakin bölmələri istirahət üçün geri çəkmirlər.

Analitiklərin fikrincə, ruslar Limanın şimal-şərqindəki mövqelərindən istifadə edərək Ukraynanın nəzarətində qalan Luqansk vilayətinin 1%-ni ələ keçirməyə çalışa bilərlər. Bu, Rusiyaya danışıqlar masasında mövqeyini gücləndirmək üçün lazımdır.

Rusiya yeni hücuma hazırlaşır

Xatırladaq ki, Ukrayna prezidenti Volodimir Zelenski bildirib ki, Rusiya daha iki Ukrayna vilayəti – Sumı və Xarkov istiqamətində hücuma hazırlaşır və bunun üçün vaxt qazanmağa çalışır.

Zelenskinin sözlərinə görə, bu hücum yazda baş tuta bilər və kəşfiyyat məlumatları bunu təsdiqləyir.

Məlumata görə, Sumı və Xarkov vilayətlərinə yeni hücumu Rusiya lideri Vladimir Putin səkkiz ay əvvəl başlatmaq istəyirdi. Lakin Ukrayna Silahlı Qüvvələrinin Kursk vilayətində keçirdiyi xüsusi əməliyyat onun planlarına düzəliş edib.

Musavat.com