Bakı Ağır Cinayətlər Məhkəməsində mənimsəmə və vəzifə səlahiyyətlərindən sui-istifadədə ittiham olunan Emal Sənayesi üzrə Bakı Dövlət Peşə Təhsil Mərkəzinin sabiq direktoru Mətləb Hüseynov və baş mühasib işləmiş Aynaxanım Babayevanın növbəti məhkəmə prosesi keçirilib.

"Unikal"ın məlumatına görə, hakim Azər Tağıyevin sədrliyi ilə keçirilən prosesdə bir çox məqamlara aydınlıq gətirilib.

Məlum olub ki, Aynaxanım Babayeva Emal Sənayesi üzrə Bakı Dövlət Peşə Təhsil Mərkəzinin müdir müavini, hazırda direktor vəzifəsini icra edən Asif Bayramov və digər müavin ibtidai istintaq dövründə öz aralarında razılığa gəliblər ki, Aynaxanım Babayeva dəymiş ziyanı istintaq vaxtı ödəməsin və Mətləb Hüseynova qarşı yalançı şahidlik edərək onun həbs edilməsinə nail olsunlar. Bu zaman həmin ziyan ümumilikdə Mətləb Hüseynovun üzərində qalsın. Ancaq Bakı Ağı Cinayətlər Məhkəməsinin hakimi Azər Tağıyevin sədrliyi ilə keçirilən prosesdə bir çox məsələlər aydınlaşıb. Həmçinin yuxarıda adını sadaladığım şəxslərin Mətləb Hüseynova qarşı birləşərək əlbir olmaları hakim Azər Tağıyev tərəfindən sübuta yetirilib.

Qeyd edək ki, Peşə Təhsil Mərkəzində baş mühasib işləmiş, hazırda təqsirləndirilən şəxs statusunda olan Aynaxanım Babayeva özü dövlətə dəymiş ziyanı tam olaraq ödəyib.

Onu da vurğulayaq ki, məhkəmə prosesində dindirilən şahidlərin hamısı ibtidai istintaq dövründə Aynaxanım Babayeva tərəfindən Mətləb Hüseynova qarşı yönəldildiklərini və Asif Bayramov tərəfindən təzyiqə məruz qaldıqlarını etiraf ediblər.

Mətləb Hüseynov isə bu kampaniyanın başlanmasının səbəbini belə izah edib: "Mən rəhbərlik etdiyim təhsil müəssisəsinə təyin olunduqdan sonra Aynaxanim Babayevanın bir neçə ailə üzvü və qohumunu işdən çıxartdım. Təkcə gəlinini işdə saxladım. Bu səbəbdən baş mühasib müavinimlə birləşərək mənə qarşı kampaniyaya başladılar. Mən ibtidai istintaq dövründə mühasibim Aynaxanımla üzləşən vaxtı da demişəm ki, mən bu cinayəti törətməmişəm, vəzifədən heç bir zaman sui-istifadə etməmişəm".

Növbəti məhkəmə prosesi noyabr ayının 7-nə təyin olunub.

Qeyd edək ki, Mətləb Hüseynovun himayəsində 2 azyaşlı övladı var, hazırda heç bir yerdə işləmir. Aynaxanım Babayeva isə hazırda "Qafqaz Wood" MMC-də baş mühasib vəzifəsində çalışır, onkoloji xəstəliyi var, bu barədə sənədlər də vəkili vasitəsilə məhkəməyə təqdim edilib. Oğlu Rafiq də Böyük Vətən müharibəsinin iştirakçısıdır.

Cinayət işində zərərçəkmiş qismində Elm və Təhsil Nazirliyi yanında Peşə Təhsili üzrə Dövlət Agentliyi tanınıb.

Hər iki şəxsə qarşı Cinayət Məcəlləsinin 179.3.2-ci (külli miqdarda mənimsəmə) və 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham irəli sürülüb, təqsirləndirilən şəxslər barəsində ibtidai istintaq müddətində "başqa yerə getməmək qətimkan tədbiri" seçilib.

İbtidai istintaqla müəyyən edilib ki, Mətləb Hüseynov Aynaxanım Babayeva ilə əlbir olaraq işçilərin bank hesabına əlavə pullar köçürüb, sonradan həmin 175 min 365 manatı nağdlaşdıraraq mənimsəyiblər.

Onlar barədə cinayət işi Baş Prokuror yanında Korrupsiyaya qarşı Mübarizə Baş İdarəsi tərəfindən aparılıb.