Ötən gecə Həştərxanın Kirovski rayonundakı bağ evində baş verən yanğında beş uşaq həlak olub.

Musavat.com-un Rusiya mətbuatına istinadla xəbərinə görə, hadisə Kirovski rayonu, Olxovskaya küçəsi, 29 ünvanında yerləşən bağ evində baş verib.

Rusiya FHN-in yerli İdarəsinin mətbuat xidmətindən "İnterfaks"a verilən məlumata görə, evdə 4 uşağın meyiti tapılıb.

Daha sonra Rusiya İstintaq Komitəsinin Həştərxan İstintaq İdarəsi beşinci uşağın meyitinin tapılması barədə məlumat verərək, uşaqların 4-11 yaş arasında olduğunu bildirib. Məlumatda “mərhum uşaqların anası evdə olmayıb”, “cinayət işinin başlanması məsələsi həll edilir, hadisənin bütün halları müəyyənləşdirilir” deyilir.

Qeyd edək ki, ötən gecə Rusiyanın Çelyabinsk əyalətində də bie evdə baş verən yanğın zamanı 5-12 yaş aralığında olan 4 uşaq həlak olub. Bildirilir ki, uşaqların anası Ukrayna müharibəsində yaralanan ərinə baş çəkmək üçün Moskvaya gedib.

Musavat.com