Moskva və Tehran İrana qarşı hərbi gücdən istifadənin yolverilməzliyini və ölkənin nüvə enerjisi infrastrukturunu bombalamaq üçün kənardan təhdidlərin qəbuledilməzliyini vurğulayıblar.

Musavat.com xəbər verir ki, bu mövqe Rusiya Xarici İşlər Nazirliyinin açıqladığı bəyanatda əksini tapıb.

XİN başçılarının müavinləri Sergey Ryabkov və Məcid Taxt-Rəvançinin görüşündən sonra açıqlanan birgə bəyanatda qeyd olunur ki, İranın nüvə enerjisi infrastrukturunun bombalanması “bütün Yaxın Şərq regionu və bütün dünya üçün genişmiqyaslı və geriyə dönməz radioloji və humanitar nəticələrə gətirib çıxaracaq”.

Tərəflər həmçinin İranın nüvə proqramı ilə bağlı Qərbin iddialarını və anlaşılmazlıqlarıı aradan qaldıracaq “real, davamlı danışıqlar yolu ilə həll yollarını” tapmaq üçün martın 14-də Pekində keçirilən Rusiya, Çin və İran arasında yüksək səviyyəli məsləhətləşmələrdə müəyyən edilmiş kursu təsdiqləyiblər.

Qeyd edilir ki, tərəflər sıx koordinasiyanı davam etdirmək barədə razılığa gəliblər.

 

Musavat.com