Rusiya və Abxaziya investisiya sazişlərinə yenidən baxacaq və qarşılıqlı maraqların, o cümlədən Abxaziya əhalisinin və biznesin maraqlarının tarazlığı təmin ediləcək.

Musavat.com Rusiya mətbuatına istinadən xəbər verir ki, bunu Rusiya baş nazirinin müavini Aleksandr Novak Abxaziyanın siyasi xadimi Badra Qunba ilə danışıqların yekununda deyib.

Onun sözlərinə görə, sazişdə Abxaziyanın əhalisi və biznesi də daxil olmaqla, qarşılıqlı maraqlar balansı təmin olunacaq: “Bu, bütün tərəflərin maraqlarını nəzərə alan sənəd olacaq".

Qunba vurğulayıb ki, Abxaziya Rusiyadan investisiya cəlb etmək üçün şərait yaratmağa davam edəcək: "Bu, bizim üçün çox vacib sahədir. Eyni zamanda, biz istərdik ki, maraqlar balansı qorunsun. Bu, həm investorların, həm də ölkəmizin vətəndaşlarının, dövlətimizin və işgüzar dairələrin maraqlarıdır. Biz Rusiyadan sərmayələrin cəlb edilməsinə sadiqik. Son bir neçə ildə bizim fəaliyyətimiz çərçivəsində 25 milyard rubldan çox vəsait cəlb olunub".

Qeyd edək ki, Novakın bəhs etdiyi investisiya sazişi Abxaziyada Rusiya investorlarına müstəsna hüquq üstünlüklər verir. Ötən ilin ikinci yarısında Abxaziya əhalisi və biznesi onun ratifikasiyasına qarşı etirazlara başlayıb, bölgənin Rusiyayönümlü rəhbərliyi vəzifədən uzaqlaşdırılıb. Buna cavab olaraq Rusiya Abxaziyada dövlət büdcəsindən maliyyələşən işçilərə əmək haqqının ödənməsinə dəstəyi, həmçinin bölgəyə elektrik enerjisinin verilişini dayandırıb, Abxaziyanın əsas ixrac məhsulu olan mandarinin Rusiyaya idxalı kəskin məhdudlaşdırılıb. Bundan sonra Abxaziyanın yeni rəhbərliyi Rusiya hökumətinə müraciət edib, müzakirələr təklif olunub. A.Novakın səfəri məhz bu təklif əsasında reallaşıb. Lakin Rusiya tərəfi əhalinin rəyini nəzərə alaraq investisiya sazişinə yenidən baxılmasına razılıq verməli olub.

Musavat.com