Kolumbiya Dairəsi Məhkəməsi ABŞ Sülh İnstitutunun dəyəri 500 milyon dollar olan baş qərargah binasının dövlət mülkiyyətinə ödənişsiz şəkildə müsadirə olunmasına icazə verib. Bu qərar, demək olar ki, bütün əməkdaşların işdən çıxarılmasından və institutun fəaliyyətinin dayandırılmasından sonra, hökumət fəaliyyətinin səmərəliliyinin artırılması üzrə İdarənin (DOGE) təşəbbüsü ilə qəbul edilib.

Musavat.com xəbər verir ki, bu barədə “Wired” jurnalı məlumat yayıb.

İnstitutun nümayəndələri ABŞ Ümumi Xidmətlər İdarəsinə (GSA) binanın verilməsi müqabilində kompensasiya tələb ediblər. Onlar bildiriblər ki, Ronald Reyqan dövründə təsis olunmuş bu qurum icra hakimiyyəti ilə əlaqəli deyil, müstəqil fəaliyyət göstərir və Konqreslə yanaşı, özəl sponsorlar tərəfindən maliyyələşdirilir.

Həmçinin vurğulanıb ki, 500 milyon dollar dəyərindəki bina özəl investisiyalar hesabına tikilib və dövlətin onunla heç bir əlaqəsi yoxdur. Lakin məhkəmə kompensasiya tələblərini rədd edib və qeyd edib ki, bina faktiki olaraq artıq dövlətə təhvil verilib.

ABŞ Sülh İnstitutunun baş hüquq müşaviri Corc Fut bu vəziyyəti belə şərh edib:

“Bu, sanki bir oğrunun evinizə girib televizorunuzu oğurlamasına, sonra isə məhkəmənin “artıq televizor yoxdur, ona görə heç nə edə bilmərik” deməsinə bənzəyir”.

Mart ayının sonunda DOGE tərəfindən institutda genişmiqyaslı ixtisarlar aparılıb.

ABŞ Sülh İnstitutu 1984-cü ildə yaradılıb və onun əsas məqsədi dünya miqyasında münaqişələrin həllinə, onların qarşısının alınmasına töhfə verməkdir. Bu qurum partiyalardan və icra hakimiyyətindən asılı olmayan milli institut statusuna malikdir.

Musavat.com