2023-cü ilin sonunda dünyada suveren və korporativ istiqraz borclarının məbləği təxminən 100 trilyon dollar təşkil edib ki, bu da qlobal ÜDM-in həcminə bərabərdir.

Musavat.com xəbər verir ki, bu barədə İqtisadi Əməkdaşlıq və İnkişaf Təşkilatının (OECD) illik hesabatında məlumat açıqlanıb.

Hesabatda qeyd olunur ki, istiqraz buraxılışı hesabına maliyyələşdirmə 2008-ci il qlobal maliyyə böhranından sonra genişlənən pul siyasətinə uyğun olaraq artıb.Böhrandan sonrakı əlverişli mühit hökumətlər və aşağı reytinqli şirkətlər də daxil olmaqla, daha geniş emitentlər üçün istiqraz bazarlarını açıb.

Ötən ilin sonunda İƏİT hökumətlərinin ümumi istiqraz borcu 2008-ci ildən 30 trilyon dollar artaraq 54 trilyon dollar təşkil edib. Bu rəqəmin 2024-cü ildə 56 trilyon dollara yüksələcəyi proqnozlaşdırılır. Bu borcun təxminən yarısı ABŞ-ın payına düşəcək ki, bu da 2008-ci ildəkindən iki dəfə çoxdur. Avropa İttifaqının payı ümumi borcun təxminən 20 faizini, Yaponiyanınkı 16 faizini, Böyük Britaniyanınkı 6 faizini təşkil edir.

İnkişaf etməkdə olan bazarlarda və inkişaf etməkdə olan iqtisadiyyatlarda Çinin borc payı da iki dəfə artaraq ümumi borcun təxminən 30 faizinə çatıb.

Eyni zamanda dünyada dövriyyədə olan korporativ istiqrazların həcmi 21 trilyon dollardan 34 trilyon dollara yüksəlib. Artımın 60 faizdən çoxu qeyri-maliyyə korporasiyalarının payına düşüb. İnvestisiya dərəcəsi olmayan şirkətlər seqmentində istiqraz borcu 2023-cü ilin sonunda 3,4 trilyon dollara çatıb ki, bu da 2008-ci ilin göstəricisindən iki dəfə çoxdur.
OECD ölkələrinin borcunun ÜDM-ə nisbəti keçən il təqribən 83 faiz təşkil edib ki, bu da böhrandan əvvəlki səviyyələrdən 30 faiz bəndi çoxdur. Bu rəqəmin 2024-cü ildə ABŞ-da artım hesabına 84 faizə yüksələcəyi gözlənilir. Eyni zamanda Yaponiya, Portuqaliya və İspaniyada azalma proqnozlaşdırılır.

OECD ölkələri tərəfindən faiz ödənişləri 2021-ci ildəki 2,3 faizdən ötən il ÜDM-in 2,9 faizinə qədər artıb. 2024-cü ildə onun daha da artması gözlənilir. Ekspertlərin fikrincə, mərkəzi banklar bu il faiz dərəcələrini azaltmağa başlasalar belə, faiz ödənişlərində azalma yalnız 2025-ci ildə başlayacaq.

Dövlət istiqrazlarının təxminən 40 faizinin ödəmə tarixi 2026-cı ilə qədərdir. Hesabatda qeyd olunur ki, korporativ istiqrazlara gəlincə, qiymətli kağızların təxminən 32 faizinin ödəmə müddəti üç ildən çox deyil.

Musavat.com