Gəlinini amansızlıqla qətlə yetirməkdə təqsirli bilinən Qusar rayon sakini Amaxan Nəcərovun cinayət işi üzrə təfərrüatlar məlum olub.

“Ölkə.Az” xəbər verir ki, qətl hadisəsi Qusar rayonu, Avaran kəndində qeydə alınıb. Amaxan Nəcərov  saat 00:20 radələrində yaşadığı Qusar rayonunun Avaran kəndindəki evə gəlib. O, evin ikinci mərtəbəsindəki otaqda uzanıb.

Bu zaman əvvəllər mütəmadi olaraq onunla mübahisə etmiş gəlini, 1977-ci il təvəllüdlü Sevinc Məmmədovadan gün ərzində harada olmasını soruşub. Sevinc əsəbi halda cavab verərək onu nalayiq söyüşlərlə söyüb.

Amaxan Nəcərov gəlinindən evdən atası evinə getməyi və bir daha geri qayıtmamağı tələb edib. Gəlin-qaynata arasında başlamış mübahisənin gedişatında evin birinci mərtəbəsində olan təqsirləndirilən şəxs Amaxan Nəcərovun nəvəsi və zərərçəkmiş şəxs Sevinc Məmmədovanın qızı, 12 yaşlı Məryəm Nəcərova və Amaxan Nəcərovun oğlu, mərhumun həyat yoldaşı Sevinc Məmmədovanın əri Valeh Nəcərov mübahisə olan həmin otağa gəlib.

Valeh Nəcərov həyat yoldaşını sakitləşdirməyə çalışsa da, Sevinc Məmmədova onun sözlərinə əhəmiyyət verməyib. Sevinc ərinə işarə etməklə Amaxan Nəcərova divanın altında qanunsuz tüfəng saxladığını deyib. O, bu haqda polisə şikayət edəcəyini bildirib. Sevinc Məmmədova daha sonra evdən getməsi üçün əşyalarını toplamağa başlayıb.

Bundan sonra Amaxan Nəcərov gəlini Sevinc Məmmədovanın davranışından qəzəblənərək qisas alaraq onu öldürmək qərarına gəlib. O, bu məqsədlə öz otağında, divanın altında saxladığı ov tüfəngini götürüb və tüfəngin yanında olan patrondaşdan iki ədəd atəş üçün yararlı olan dolu patronları çıxararaq tüfəngin lüləsinə yerləşdirməklə atəşə hazır vəziyyətə gətirib. O, daha sonra tüfəngi həmin otaqda olan stulların arasında gizlədib.

Sevinc Məmmədova yenidən Amaxanın olduğu otağa qayıdıb və şkafda olan məişət əşyalarını toplayıb. Bu zaman Amaxan Nəcərov stulların arasında gizlətdiyi tüfəngi götürərək oğlu Valeh Nəcərovun və nəvəsi, azyaşlı Məryəm Nəcərovanın gözləri qarşısında gəlininə tərəf atəş açıb.

Həmin vaxt Sevinc Məmmədova birinci dəfə açılan atəşdən döş qəfəsindən xəsarət alıb. Bu zaman Valeh Nəcərov onun əlindəki tüfəngi almaq istəyib. Buna baxmayaraq, o, ikinci dəfə atəş açıb.

Lakin Amaxan Nəcərovun açdığı ikinci atəş hadisə yerində evin divarına dəyib. Yalnız bundan sonra Valeh Nəcərov atasının əlindən cinayətin aləti olan tüfəngi alıb və atası ilə birlikdə hadisə baş verdiyi otaqdan çıxıb. Valeh Nəcərov atasından aldığı tüfəngi sındırıb və həyətə atıb.
Daha sonra Valeh evin birinci mərtəbəsinə düşərək kömək çağırmağa gedib. Bu vaxt Amaxan Nəcərov oğlu Valeh Nəcərovun kömək çağırmağa getdiyini görüb və o, Sevinc Məmmədovanın hələ də ölmədiyini güman edərək, yenidən hadisə olan otağa qayıdıb.

Amaxan Nəcərov otaqda masanın üzərində olan bıçağı götürərək Sevinc Məmmədovanın yanında dayanıb. Amaxan bu zaman orada ağlayan və anasına qarşı başqa hərəkətlər etməmsi üçün babasına yalvaran nəvəsi Məryəm Nəcərovanın gözləri qarşısında əlindəki bıçaqla Sevinc Məmmədovanın boğazını kəsib. Sevinc Məmmədova hadisə yerində ölüb.

Amaxan Nəcərov Cinayət Məcəlləsinin 120.2.4-cü (xüsusi amansızlıqla və ya ümümi təhlükəli üsulla adam öldürmə) və 228.4-cü (qanunsuz olaraq qaz silahını, soyuq silahı, o cümlədən tullayıcı silahı əldə etmə, satma və ya gəzdirmə, milli geyim ləvazimatı hesab olunan ərazilərdə və ya ovçuluq peşəsi ilə bağlı olaraq soyuq silahı gəzdirmə) maddələri ilə ittiham edilib.

Bakı Ağır Cinayətlər Məhkəməsinin hökmü ilə Amaxan Nəcərov 18 il 6 ay müddətinə azadlıqdan məhrum edilib. Hökmdən narazı qalan Amaxan Nəcərovun vəkili apellyasiya şikayəti verib.

Vəkilin şikayəti araşdırılması üçün Sumqayıt Apellyasiya Məhkəməsinə göndərilib. Şikayət hakim Vidadi Cəfərovun sədrlik etdiyi kollegiyada araşdırılıb.

Sumqayıt Apellyasiya Məhkəməsinin qərarı ilə Amaxan Nəcərovun cəzasından 1 il çıxılıb və ona qəti olaraq 17 il cəza təyin olunub.