“Rusiya Prezidenti Vladimir Putin aprelin 1-də Moskvada Çinin xarici işlər naziri Van Yini qəbulunda iki ölkə arasındakı strateji tərəfdaşlığın artmasından məmnunluqla danışıb. Putinin sözlərinə görə, Çin lideri Si Cinpin Moskvada Böyük Vətən müharibəsinin tamamlanmasının 80 illiyi ilə bağlı tədribdə onun əsas qonağı olacaq”.

Bu barədə Musavat.com-a açıqlamasında politoloq Elxan Şahinoğlu deyib.

Politoloq qeyd edir ki, “əsas qonaq” ifadəsi o deməkdir ki, Si Cinpin protokol görüşlərdə və paradda Vladimir Putinin yanında dayanacaq:

“Van Yi Moskvaya səfəri zamanı əvvəlcə rusiyalı həmkarı Sergey Lavrovla görüşüb. Bundan sonra Van Yi Vladimir Putinlə təkbətək görüş keçirib. Böyük ehtimalla bu görüşdə Rusiya Prezidenti ölkəsinin ABŞ-la apardığı danışıqlar barədə Van Yini məlumatlandırıb. Putin bunu ona görə edib ki, Pekinin Moskva-Vaşinqton danışıqlarıyla bağlı narahatlığı olmasın. Çünki. ABŞ Prezidenti Donald Tramp və onun administrasiyasının üzvləri Rusiya-Çin ittifaqını zəiflətmək istəklərini gizlətmirlər.

Putin üçün Si Cinpinin mayın 9-da Moskvaya səfəri həm də ona görə əhəmiyyətlidir ki, Rusiya paytaxtında faşist Almaniyası ilə yanaşı militarist Yaponiya üzərində qələbənin də 80 illiyi qeyd olunacaq. Bununla Putin vurğulamaq istəyəcək ki, ümumi düşmənlər üzərində qələbədə Çinin də payı olub. Halbuki, həmin dövrdə Çin parçalanmış halda idi, ölkənin bir hissəsi Yaponiya işğalı altında, digər ərazisində isə Mas Tsedunun rəhbərlik etdiyi kommunistlərlə Çan Kayşinin qüvvələri arasında toqquşmalar qeydə alınırdı. Müxtəlif hesablamalara görə, Çin İkinci Dünya müharibəsində 35 milyona yaxın vətəndaşını itirib. Bu keçmiş SSRİ-nin itkilərindən də çoxdur.

Van Yi Putinlə görüşdə “bizim əməkdaşlığımız üçüncü ölkələrə qarşı yönəlməyib” ifadəsini səsləndirib. Rusiya Prezidenti də bu ifadəni tez-tez təkrarlayır. Bu cümlə ABŞ-a ünvanlansa da, Çinin qonşuları deyilənlərin reallığa uyğun olmadığını düşünürlər. Misal üçün Çinlə Rusiya arasında Yaponiya sahillərinə yaxın sularda tez-tez birgə hərbi təlimlər keçirilir. Bu hərbi təlimləri Tokio Yaponiyaya qarşı əzələ nümayişi kimi qiymətləndirir”.

Xalidə Gəray
Musavat.com