Rövşən Məhərrəmov: “Uzun illər hərbi bazanın komandiri olub, pillə-pillə, təcrübə toplaya-toplaya...”

Xəbər verildiyi kimi, Azərbaycan Hərbi Hava Qüvvələrinin komandanı general-leytenant Ramiz Tahirov az öncə yaş həddi ilə əlaqədar xidmətdən azad edilib. General-mayor Namiq İslamzadə Hərbi Hava Qüvvələrinin yeni komandanı təyin olunub. O, şəxsi heyətə təqdim edilib.

Bəllidir ki, Namiq İslamzadə bu təyinatadək Hərbi Hava Qüvvələri komandanının müavini vəzifəsində xidmət edib. 9 dekabr 2020-ci ildə Prezident İlham Əliyevin sərəncamı ilə ona Vətən Müharibəsi Qəhrəmanı adı verilib. O da məlumdur ki, müasir dövrdə uğurlu döyüş əməliyyatı xeyli dərəcədə hərbi hava qüvvələrinin peşəkarlığından asılıdır. 44 günlük Vətən savaşı da bunu təsdiqlədi. 

“Azərbaycanda Milli Ordunun sözün əsl mənasında milliləşməsi prosesi, demək olar, başa çatmaq üzrədir. Uzun illər SSRİ/Rusiyada təhsil alan generallar orduda hakimi-mütləq idilər. Azərbaycanın 90-cı illərin ortalarından başlayaraq Türkiyə Ali Hərbi Məktəblərində oxumağa göndərdiyi məzunlar indi artıq orduda üst vəzifələrə gəlirlər. Bunun daha bir örnəyini gördük - general-mayor Namiq İslamzadə Hərbi Hava Qüvvələrinə (HHQ) yeni komandan təyin edildi. Cənab İslamzadə 1992-ci ilin sentyabr ayında təhsilini davam etdirmək üçün Türkiyə Respublikasının Ali Hərbi Təyyarəçilik Məktəbinə göndərilib və 1996-cı ildə həmin məktəbdən təyyarəçi ixtisası üzrə məzun olub”-bunu ekspert Natiq Cəfərli qeyd edib. Cəfərli vurğulayıb ki, Azərbaycan Ordusu Türkiyə (NATO) modelinə keçir, Türkiyə ilə hərbi və təhlükəsizlik məsələləri ilə bağlı inteqrasiya prosesi yüksələn xətlə davam edir.

Hərbi ekspert, polkovnik Rövşən Məhərrəmov “Yeni Müsavat”a bildirdi ki, Namiq İslamzadə kimi peşəkar, vətənpərvər, təcrübəli hərbçinin Hərbi Hava Qüvvələrinə komandan təyin edilməsi çox müsbət addımdır. Bu təyinat Hərbi Hava Qüvvələrinin daha da inkişafında öz təsirini göstərəcək: “Mən Namiq İslamzadəni yaxşı tanıyıram, çox yüksək səviyyəli zabitdir, mükəmməl səviyyəli pilotdur. Hərbi paradlarda pilatajlar göstərən bütün təyyarəçilərimizi o hazırlayıb. Yeni ştata görə Hərbi Hava Qüvvələrinə hava hücumundan müdafiə qoşunları və hərbi hava qüvvələri daxildir. Əvvəllər ştatda ümumi hərbi hava qüvvələri komandanı hava hücumundan müdafiə üzrə mütəxəssis olmalı idi. İndi təzə ştata görə hərbi hava qüvvələrinin komandanı pilotlardan təyin olunmalıdır. General Namiq İslamzadə həm peşəkar pilotdur, həm də uzun müddətdir fəaliyyətdədir, təşkilatçılıq qabiliyyətinə malikdir, uzun illər hərbi bazanın komandiri olub, pillə-pillə, təcrübə toplaya-toplaya yuxarı vəzifələrə təyin edilib, müharibə zamanı çox böyük sücaətlər göstərib və buna görə Vətən Müharibəsi Qəhrəmanı fəxri adına layiq görülüb. Bir sözlə, general Namiq İslamzadə çox uğurlu kadrdır. Adı heç zaman qanunsuzluqlarda hallanmayıb. Azərbaycanın hava hücumundan müdafiə və hərbi hava qüvvələri uğurlu inkişaf yolu keçib və son zamanlar bu sahəyə diqqət daha da artırılıb. 44 günlük Vətən müharibəsində hərbi hava qüvvələrimiz, hava hücumundan müdafiə qüvvələrimiz dünyanı heyrətə gətirən performans göstərdilər”.

Ekspertin sözlərinə görə, Azərbaycan Ordusunun Türkiyə ordusu sisteminə keçidi prosesi Hərbi Hava Qüvvələrini də təbii ki, əhatə edib. Namiq İslamzadə bu prosesin uğurla getməsində çox böyük zəhməti, rolu olan yüksək vəzifəli zabitlərimizdəndir: “Şəxsi keyfiyyəti, mütəxəssis kimi ən yüksək bilik və təcrübəsi, təşkilatçılıq bacarığı olan zabitin Hərbi Hava Qüvvələrinə komandan təyin edilməsi bu sahənin gələcəyi barədə daha da nikbin olmağımıza əsaslar yaradıb”.   

Etibar SEYİDAĞA,

“Yeni Müsavat”