Ölümlə nəticələnən qəza törədən sürücüyə hökm oxundu

Tovuzda ölümlə nəticələnən yol qəzası törədən şəxs hakim qarşısına çıxarılıb. Mərhumun qardaşı sürücünü bağışlayıb.

Musavat.com xəbər verir ki, 42 yaşlı Elton Hüseynov idarə etdiyi "Hyundai HD-72" markalı yük avtomobili ilə Abbasov Şakir Fərhad oğlunun idarə etdiyi "VAZ-2106" markalı avtomobili vurub.

Qəza zamanı Ş.Abbasov ağır xəsarət alıb. Xəstəxanaya çatdırılsa da, onun həyatını xilas etmək mümkün olmayıb.

Hadisəyə səbəb Elton Hüseynovun yol hərəkəti qaydalarını pozması olub. E.Hüseynov əməlindən peşman olduğunu deyib.

Firmalardan birində sürücü kimi çalışan Elton Hüseynov həmin gün mağazalara kolbasa çatdırmaq üçün yola çıxıbmış. O, yol kənarındakı nişana diqqət etmədiyini bildirib.

Mərhumun ailəsi ilə barışdığını, dəymiş maddi ziyanı ödədiyini qeyd edən Hüseynov 3 uşağının olduğunu, barəsində yüngül cəza təyin edilməsini xahiş edib.

Mərhumun hüquqi varisi olan qardaşı E.Hüseynovu bağışladığını deyib.

Məhkəmə Elton Hüseynov barəsində 2 il azadlıqdan məhrumetmə cəzası təyin edib. O, cəzasını məntəqə tipli cəzaçəkmə müəssisəsində çəkəcək. Barəsində seçilmiş polis nəzarətinə verilmə qətimkan tədbiri qüvvədə saxlanılıb.

İ.Muradov
Musavat.com

08.03.2025 13:23
317