Türkiyənin Diyarbəkir vilayətində keçirilən Novruz tədbirində terror təbliğatı apardığı və polisə daş atdığı müəyyən edilən 200-ə yaxın adam saxlanılıb.

Musavat.com Türkiyə mediasına istinadən xəbər verir ki, Novruz bayramı tədbiri HDP-nin rəhbərliyi ilə təşkil edilib.

Tədbirdə HDP həmsədri Mithat Sancar, CHP İstanbul millət vəkili Sezgin Tanrıkulu, bəzi HDP millət vəkilləri və bəzi qeyri-hökumət təşkilatlarının nümayəndələri də iştirak edib.

Mahnıların oxunduğu, rəqsin nümayiş olunduğu, Novruz tonqalının yandırıldığı tədbirdə bəzi iştirakçılar terror təbliğatı apararaq ərazidəki polis əməkdaşlarına daş və su qabları atıb, 10-a yaxın polis yüngül xəsarət alıb.

Həmçinin Novruz tədbirində terror təşkilatı PKK-nı simvolizə edən plakatlar açılıb, təşkilatın lideri Abdullah Öcalanın lehinə şüarlar səsləndirilib.

Tədbir yekunlaşdıqdan sonra kimlikləri müəyyən edilən 200 nəfər polis tərəfindən saxlanılıb.

Musavat.com