Rusiyalı jurnalist Kseniya Sobçak məişət zorakılığından bəhs edən filmini təqdim edib.

Musavat.com yerli mediaya istinadla xəbər verir ki, film sabiq nazir Bişimbayevin məşhur məhkəməsindən bəhs edir.

Bir müddət əvvəl rusiyalı teleaparıcı Kseniya Sobçak Qazaxıstan paytaxtına səfər edib. Onun səfərində məqsəd Səltənət Nukenovanın qətli ilə bağlı məhkəmə prosesini işıqlandırmaq olub. Astanada olarkən Kseniya Sobçak mərhumun dostu, Nukenova və Bişimbayevlə birlikdə Dima Bilanın konsertinə qatılan Səltənətin dostu Aida Axmedina ilə söhbət edib. Film üçün həm də Səltənət Nukenovanın əmisi oğlu Samal Nukenova və qardaşı Aytbek Amangeldi müsahibə verib.

Nukenovanın qardaşı Aytbek Amangeldi mərhum bacısı ilə bağlı xatirələrini bölüşüb.

“Uşaqlıqdan çox şən, açıq və ünsiyyətcil idi. Biz onu həmişə danışan Saltuşka adlandırırdıq. Həmişə dayanmadan nədənsə danışdığına və oxumağı sevdiyinə görə belə bir ləqəbi var idi”, - deyə Amangeldi bildirib.

Kseniya Sobçak öz filmində yüksək siyasi vəzifələrdə çalışan və mənimsəmədə təqsirli bilinən müttəhim Kuandıq Bişimbayevin şöhrətindən bəhs edib. O, bir dəfə məhkum edilib, lakin sonradan Nazarbayev tərəfindən əfv olunub.

Bişimbayevin keçmiş həyat yoldaşı Nazim Kaharman da Kseniya Sobçaka müsahibə verib. O, keçmiş ərinin çoxsaylı xəyanətlərini danışıb.

“Hər şey ona görə bitdi ki, mən sağlamlığım üçün təhlükə gördüm, çünki onu həyatım üçün təhlükə sayırdım. Təəssüf ki, o, həbsxanadan daha qəzəbli, daha çox özünə qapanan və daha çox özünüdüşünən biri kimi çıxmışdı. Bir ay yaşadıq, sonra bu qalmaqal baş verdi. Gəldi, həbsxanada olduğu zaman ona kömək edən heyrətamiz bir qadınla tanış olduğunu söylədi. Düşünürəm ki, nə yaxşı ki, o zaman ona kömək etdim və münasibətimizə nöqtə qoydum”, - deyə Kaharman bildirib.

Kseniya Sobçak da filmin bir hissəsini Qazaxıstanda bu yaxınlarda qəbul edilmiş məişət zorakılığı haqqında qanuna həsr edib.

Musavat.com