Valideynlərinin incəsənət nümayəndələri olması onun gələcəyinə birbaşa təsir edib və o kiçik yaşlarında teatrla tanış olub. Rusiyada vətəndaş müharibəsi zamanı Vsevolod Blyumental-Tamarin artıq müstəqil olaraq səhnədə çıxış edib.

45 yaşında RSFSR-in əməkdar artisti adını alan Tamarini Moskvanın ən yaxşı aktyorları təbrik ediblər. Sovet ərazisində məşhur olması onun nasistlərin tərəfinə keçməsinə mane olmayıb.

Atası tərəfdən alman olan aktyor 1941-ci ildə 60 illik yubileyinə hazırlaşan zaman müharibə başlayıb və o, ailəsi ilə birlikdə Ukraynanın Çernivts şəhərində olub. Lakin o, tez paytaxta qayıtmağı bacarıb və almanları gözləmək üçün Moskva bölgəsindəki bağ evində məskunlaşıb. Bu, əvvəlcədən düşünülən planın tərkib hissəsi olub.

Yozef Göbbelsdən ötə təbliğatçı

Gündüzlər sənətçinin ailəsi guya təxliyə üçün əşyalarını yığıblar, gecələr isə bağ evinin yanındakı dərədə sığınacaq qazıblar. Nəhayət, cəbhədən silah səsləri eşidilməyə başlayıb. Qonşu evin komissarı onları tələsdirmək üçün dayansa da, Blyumental-Tamarin sonra gələcəyini deyib.

Amma əslində onlar sığınacaqda gizləniblər. 12 gün sığınacaqda qalan artist nasistləri görəndə sevinib və öz atasının alman olduğunu xatırladaraq onların hakimiyyətinə hər cür köməklik göstərməyi vəd verib. Tamarin 3-cü Reyxin əsas təbliğatçısı və Hitlerin ən yaxın silahdaşı Yozef Göbbelsin “Vineta” təşkilatının aksiyalarında fəal iştirak edib.

Təşkilat milli bölmələrdə işləyib, SSRİ-nin hər bir xalqında öz müstəsnalıq hissini hər cəhətdən qızışdırıb. Odur ki, aktyor “Vineta” üçün əvəzolunmaz tapıntı olub. Aktyorluq istedadı sayəsində o, Stalinin səsini təqlid etməyi bacarıb.

Stalinin səsi ilə SSRİ-nin məhvə məhkum olduğunu, qırmızı ordunun almanlara müqavimət göstərmək gücünə malik olmadığını, ona görə də tezliklə kapitulyasiya imzalayacağını deyib.

Həm radioda, həm də qəzetdə işlədiyinə görə Tamarinin məvacibi 600 reyxsmark olub. O, həmçinin gizli şəkildə faşistlər üçün “Yəhudi Moskvası” adlı kitab nəşr edib və orada yəhudilərə qarşı nifrətindən yazıb.
Aktyor bir neçə dəfə konsentrasiya düşərgələrinə gedib, insanları onlara rahatlıq gətirəcək yeni nizama qoşulmağa çağırıb. Hətta “Vineta”da da o, vaxtaşırı yazıçı yoldaşları haqqında gestapoya donoslar yazıb.

“Rinq” planı

1942-ci il martın 27-də Vsevolod Aleksandroviç Blyumental-Tamarin SSRİ Ali Məhkəməsinin hərbi kollegiyası tərəfindən qiyabi olaraq ölüm cəzasına məhkum edilib. Təhlükəsizlik orqanlarının əməkdaşlarına qiyabi cəzanı reallaşdırmaq tapşırılıb.

Onlar işi İqor Miklaşevskiyə həvalə etmək qərarına gəliblər. Əla fiziki formada olan gənc müharibədən əvvəl Leninqradın boks çempionu titulunu qazanıb. Miklaşevskinin aktyora yaxınlaşmaq üçün üstünlükləri çox olub. Teatr camiəsində çoxları onun anasını tanıyıb və özü də Blyumental-Tamarinin arvadının qardaşı oğlu olub.

SSRİ Xalq Daxili İşlər Komissarlığının Moskvadakı 3-cü idarəsinin 2-ci şöbəsinin rəisi, mayor Viktor boksçunu Moskva yaxınlığında komissarlığın xüsusi düşərgəsində təlimə göndərib. Bundan sonra onun öz operativ ləqəbi yaranıb: “Udarov”. Nəticədə “Rinq” əməliyyatı başlayıb.

Smolensk vilayətində, Borisovka kəndi yaxınlığında Miklaşevski cəbhə xəttini keçib və almanlara qaçdığı iddia edilən bölmənin adını çəkib. Lakin həmin bölmədən faşistlərə qoşulmaq üçün yenicə qaçan iki nəfər onu tanımadığını deyib. Miklaşevski qohumu haqqında ətraflı hekayə danışandan sonra ölümdən xilas olub və yaxınlıqdakı hərbi əsir düşərgəsinə göndərilib.

Onlar ilk dəfə 1944-cü ilin yanvarında “Vineta” radiostansiyasının köçürüldüyü Köniqsberqdə görüşüblər. Miklaşevski qohumunun evini bir neçə dəfə ziyarət etsə də, heç vaxt Tamarini tək tuta bilməyib. 1944-cü ilin yayında Blyumenthal-Tamarin “Vineta” ilə birlikdə Berlinə qayıdıb. Sadiq xidmətinə görə almanlar aktyorun kriminal polisdə işləməsini təşkil ediblər və o, maaşını spirtli içki ilə alıb.

1944-cü ilin iyununda Miklaşevski yaralandığı üçün qərb cəbhəsindən tərxis olunaraq Almaniyaya göndərilib və Münzingen şəhərinə gəlib və nəhayət, təxminən 3 il əvvəl qiyabi çıxarılan hökmü reallaşdırıb. O, dostundan oğurladığı "Parabelllum" markalı tapança ilə Tamarini güllələyib.

Müharibədən sonra İqor Miklaşevski SSRİ-yə qayıdıb və idmanla ciddi məşğul olmağa davam etmək istəsə də, səhhəti buna imkan verməyib. Sonra məşqçiliyə başlayıb və bir neçə ölkə çempionu yetişdirib.

İlkin Nəcəf, xüsusi olaraq Musavat.com üçün