Avropa İttifaqının Kişinyovdakı missiyasının rəhbəri Yanis Majeykis oktyabrın 20-də Moldovada keçiriləcək prezident seçkiləri və Avropa referendumunda vəziyyəti dəyişə biləcək bəyanatla çıxış edib.

Musavat.com xarici mediaya istinadla xəbər verir ki, o, Aİ üzvlüyünə namizədlər üçün şərtlərdən biri kimi əcnəbilər tərəfindən kənd təsərrüfatı torpaqlarının alınmasına icazə verilməsi olduğunu deyib.

Moldova Respublikasının baş naziri Dorin Reçan isə Brüsseldə bunun qarşısını almağa çalışacağını bildirərək seçiciləri sakitləşdirməyə çalışıb. Keçmiş baş nazir Vlad Filat Aİ qanunvericiliyinin normalarını dərc edib, buna görə ölkə ittifaqa daxil olduqdan sonra əcnəbilərə torpaq satışını qadağan edə bilməz. Qalmaqal getdikcə böyüyür.

“Həqiqətən, Aİ-də kapitalın sərbəst hərəkəti var və bir Aİ üzv dövlətinin hər bir vətəndaşı başqa bir üzv ölkədə hər şeyi ala bilər... Bu, ölkəniz üçün müsbət bir şey ola bilər”, - deyə Avropa İttifaqının Moldova Respublikasındakı nümayəndə heyətinin rəhbəri Yanis Majeykis televiziyada bildirib. “Mən çoxlu tərk edilmiş kəndlər və çox az əhalisi olan kəndlər görürəm və bu kəndlərdəki torpaqlar əcnəbilərə satılsaydı, orada daha çox iqtisadi fəallıq olardı”, o deyib.

Aİ səfiri etiraf edib ki, “xaricilər Moldovanın Aİ-yə daxil olduğu anda torpaq ala bilərlər”. O, Moldova Respublikasının buna müqavimət göstərməyə çalışa biləcəyinə diqqət çəkib, lakin diplomat bunu məsləhət görmür.

Majeykis gerçəkləri desə də, Moldova vətəndaşlarının buna hazır olmadığı görünür. Onlara ölkələrinin hansı şərtlərlə Avropa Birliyinə qəbul oluna biləcəyi əvvəlcədən izah edilməyib. Hakimiyyət belə qərara gəlib ki, əvvəlcə Avropa referendumunu keçirsin, əksəriyyəti kənd sakinləri olan əhalinin dəstəyini alsın, Aİ-yə inteqrasiya siyasətini konstitusiyaya daxil etsin, sonra hər şeyi birtəhər yoluna qoysun.

Lakin Majeykisin sözləri oktyabrın 20-də keçiriləcək Avropa referendumunda, eləcə də həmin gün baş tutacaq prezident seçkilərində vəziyyəti iqtidarın ziyanına dəyişə biləcəyini anlayan baş nazir Dorin Reçanı qorxuya salıb.

Musavat.com