Bakı Ağır Cinayətlər Məhkəməsində hakim Rasim Sadıxovun sədrliyi ilə Elşən Hüseynovun cinayət işi üzrə məhkəmə prosesi davam edir.

Hakim qarşısına çıxarılan Elşən Hüseynov  "Məşədi Dadaş” məscidinin axundu Əli Şərbətovu dini ədavət niyyəti ilə öldürməyə cəhd etməkdə ittiham olunur.

Musavat.com xəbər verir ki,   prosesdə zərərçəkmiş Rəsul Həsənli ifadə verib. Deyib ki,  təqsirləndirilən şəxsi hadisə zamanı tanıyıb.

Məsciddə xidmətçi olan zərərçəkən deyib ki, hadisə baş verən gün iş yerində olub:

"Oturmuşdum, qapı döyüldü. Elşən Hüseynov içəri girdi, Hacını soruşdu. Dedim ki, Hacı yoxdur, çıxdı getdi. İkinci dəfə gələndə yenə də Hacını soruşdu. Dedim ki, yanında qonaqlar var, içəri girmək olmaz. Əl atdı yaxama, cibindən bıçaq çıxardı. Qulaq və mədəmin aşağı hissəsindən zərbə vurdu. Fikirləşməzdim ki, məsciddə bıçaq çıxarar. Bu zaman bayıra çıxdım. Arxamca gəldi. Baxdım ki, məndən qan gəlir, orada xanım var idi. Ondan xahiş etdim ki, təcili yardım çağırsın. Sonra təcili yardım, polislər gəldi. Məni xəstəxanaya apardılar,  əməliyyat olundum".

Dövlət ittihamçısının suallarını cavablandıran zərərçəkmiş deyib ki, Əli Şərbətovla təqsirləndirilən şəxsin hər hansı bir əlaqəsi olduğunu görməyib, həmin gün də Əli Şərbətov ona deyib ki, qonaqları yola salsın, sonra Elşən Hüseynovla görüşəcək:

"Elşən Hüseynovdan soruşdum ki, nə işin var. Dedi ki, 12-ci İmamam. Mən də bunu Hacıya dedim. Hacı da dedi ki, görüşək görək nə istəyir".

Dövlət ittihamçısı zərərçəkmişdən təqsirləndirilən şəxsin qeyri-adekvat hərəkətlər etməsini hiss etməsi ilə bağlı soruşub. O isə cavab verib ki, Elşən Hüseynovdan heç bir qeyri-adi hərəkət hiss etməyib.

Daha sonra əlavə edib ki, hadisə zamanı məsciddə namaz qılanlar olub: "Həmin vaxt Elşən Hüseynov çölə çıxıb, söyüş söydü. Dedi ki, səni də, qardaşını da, Əli Şərbətovu da öldürəcəm. Mənə 2 bıçaq zərbəsi dəyib. Biri qulaq nahiyəmdən, digər isə qarın nahiyəmdən".

Müttəhim Elşən Hüseynov zərərçəkmişdən bıçaq zərbəsinin qulağının sağ və ya sol nahiyəsinə dəyməsini soruşub. İddia edib ki, zərərçəkmişin sol qulaq nahiyəsinə xəsarət yetirib. Bildirib ki, zərərçəkmişi öldürmək məqsədilə ora gəlib, onun boğazını kəsmək istəyib.

Şahid qismində ifadə verən Elvira Əhmədova deyib ki, məscidlə üzbəüz dini mağazada işləyir, təqsirləndirilən şəxsi tanımayıb, amma zərərçəkmiş Rəsul Həsənlini məscidin xidmətçisi kimi tanıyıb:

"Rəsul qulağı qan içində mağazaya girdi. Dedi ki, həkim, polis çağır. Mən də təcili yardım çağırdım".

Digər şahid Dəyanət Mehdiyev ifadəsində göstərib ki, hadisə baş verən günü məscidə ibadət etməyə gəlib: "Məscidə girəndə yerdə qan damcıları var idi. Qanı görəndən sonra bu qardaşı gördüm, elə bildim ki, onu təkləyiblər. Mənə dedi ki, buradan get, yoxsa başın ağrıyar. Sonra bildirdi ki, mən sonuncu peyğəmbərəm. Fikirləşdim ki, bu nə danışır belə, dəlidir, nədir. Sonra maşınıma minərək getdim".

İttiham aktında göstərilib ki, 2023-cü il avqustun sonunda Elşən Hüseynov “Məşədi Dadaş” məscidinin axundu Əli Şərbətovla görüşüb fikirlərini bölüşüb, onların arasında fikir ayrılıqları yaranıb. Bir daha görüşmək üçün orada olarkən xidmətçi kimi çalışan Rəsul Həsənli onu içəri buraxmayıb.

Bir neçə ay bu hal davam etdikdən sonra Elşən Hüseynov bıçaqla yenidən məscidə gedib. İçəri daxil olmaq istəyərkən qarşısını alan Rəsul Həsənliyə bıçaqla xəsarət yetirib, sui-qəsd törətmək üçün Əli Şərbətovun otağına daxil ola bilməyib.

Dövlət Təhlükəsizliyi Xidmətində aparılan araşdırmalarla müəyyən olunub ki, 2023-cü ilin dekabrın 30-da Elşən Hüseynov Nəsimi rayonunda yerləşən “Məşədi Dadaş” məscidinə bıçaqla daxil olaraq oranın imamı olan və ictimai xadim sayılan Əli Şərbətovun xidməti fəaliyyətinə son qoymaq niyyəti ilə ona sui-qəsd etmək qərarına gəlib.

Elşən Hüseynov Əli Şərbətovun otağına daxil olmaq istəyərkən məscidin xidmətçisi Rəsul Həsənli onun qarşısını alıb.

Bu zaman Elşən Hüseynov Rəsul Həsənlini qəsdən öldürmək məqsədilə ona çoxsaylı bıçaq xəsarətləri yetirib. Elşən Hüseynov Rəsul Həsənlinin müqaviməti səbəbindən Əli Şərbətovun xidməti otağına girə bilməyib. Bu səbəbdən o, Əli Şərbətova sui-qəsd istəyini reallaşdıra bilməyib.

Hüseynov Elşən Fəxrəddin oğlu Dövlət Təhlükəsizliyi Xidməti tərəfindən AR Cinayət Məcəlləsinin 29, 120.2.3 (zərərçəkmiş şəxsin xidməti vəzifəsini yerinə yetirməsi ilə əlaqədar onun özünü öldürməyə cəhd), 29, 120.2.6 (başqa cinayətin törədilməsini yüngülləşdirmək məqsədilə adam öldürməyə cəhd) 29, 120.2.7 (iki və ya daha çox şəxsi öldürməyə cəhd), 29, 120.2.11 (terrorçuluqla əlaqədar adam öldürməyə cəhd), 29, 120.2.12 (dini ədavət niyyəti ilə adam öldürməyə cəhd) və 277-ci (İctimai xadimin həyatına sui-qəsd etmə) maddələri ilə nəzərdə tutulan cinayət əməllərini törətməkdə təqsirli bilinərək cinayət məsuliyyətinə cəlb olunub və barəsində həbs qətimkan tədbiri seçilib.

Proses dekabrın 10-da davam  etdiriləcək.

E.MƏMMƏDƏLIYEV,
Musavat.com