Sosial şəbəkələrdə Türkiyə marketlərinin birində işləyən satıcının paylaşdığı video diqqət çəkib. Videoda ətin yeməyə yararsız hissələri və yeməyə yararlı hissələri ayrı-ayrılıqda ət maşınından keçirilir. Nəticədə isə arada heç bir fərq görünmür. Satıcı insanların bu yolla aldadıldığını bildirir. İstehlakçı arada heç bir fərq görməsə də sağlamlığına və büdcəsinə ziyan dəyir.

Ölkəmizdə vəziyyət necədir?

Marketlərdən çəkilmiş ət almağa dəyərmi?

Məsələ ilə bağlı news24 saytının suallarını qida eksperti Ağa Salamov cavablayıb:

"İstehlakçıların hazır çəkilmiş ət almağını məsləhət görmürük. Hansı ki, həmin məhsullar brend marka altında satılmır, təsdiqlənmiş deyil və baytar nəzarəti altında kəsilmir. Məsələn, ət aldığınız şirkətə qida institutundan nəzarət var, baytarı var, qida zənciri qırılmayıbsa ,o zaman, etibar etmək olar. Ancaq etibar etmədiyimiz mənbələr də var. Supermarketlərdə işıqlandırma sistemi elədir ki, çəkilmiş ət qıpqırmızı görünür. Şübhədən çıxmaq üçün həmin məhsullardan uzaq durmaq lazımdır. Ən yaxşısı,sümüksüz ət alıb, özümüz qiymə halına salaq. Bu, daha məqsədəuyğundur. Qiymələr bəzən başqa ət ilə də sintez edilir. Məsələn, qoyun ətinin çıxıntıları mal ətinə qarışdırılır. Digər bir aldadıcı vasitə isə süni rəngləndiricilərdir. Həmin rəngləndiricilər vasitəsilə ətin rəngi qırmızı görünür. Rəngləndirilən əti su ilə yuduqda,rəngini buraxır. Vətəndaşlar əti özləri çəkməli və ya marketdə çəkdirməlidir".