Macarıstan Avropa İttifaqı Sülh Fondundan Ermənistana 10 milyon məbləğində dəstək verilməsinin qarşısını kəsib.

Avropa Sülh Fondu Aİ büdcəsi hesabına maliyyələşdirilən bir fonddur. Fond 2021-ci ildə yaradılıb və 2027-ci ilə qədər fəaliyyətinin uzadılması planlaşdırılır. Fondun hazırkı büdcəsi 17 milyard avrodur. Sonuncu dəfə fondun 15 milyon avro məbləğində pulu Qərbi Afrikadakı Kot-d'İvuar hərbçilərə ayrılıb. Kot-d'İvuar qeyri-qanuni silahlı qruplarla mübarizə aparır. Ermənistana verilməsi nəzərdə tutulan yardımın məbləği daha az olsa da, regional təhlükəsizlik baxımından mühüm əhəmiyyətə malikdir.

Musavat.com xəbər verir ki, bu fikirləri politoloq İlyas Hüseynov bildirib. O, "10 milyon avro nəyə xərclənəcək" sualını belə cavablandırıb: "Terrorun Damokl qılıncı daha çox kimin üstündə asılır: Azərbaycanın, yoxsa Ermənistanın? Rəsmi Budapeşt Macarıstan Avropa İttifaqı Sülh Fondundan Ermənistana 10 milyon avro məbləğində dəstək verilməsi layihəsini bloklamaqla tamamilə haqlıdır.

Macarıstan blokun aradan qaldırılması üçün müzakirə olunan proqrama Azərbaycanın da daxil edilməsini tələb edir.

Bu maliyyə yardımı bir batalyon üçün modul tipli səhra düşərgəsi yaratmağı, bu düşərgəyə bir tibbi yardım klinikası, habelə müvafiq xidmətlər və imkanlar daxil edilməsini nəzərdə tutur. 

Ermənistanın “Radio Azatutyun” xəbər agentliyi (“Azadlıq” radiosunun yerli filialı, ABŞ hökuməti tərəfindən maliyyələşdirilir) xəbər verir ki, Macarıstan hökuməti Ermənistana Aİ Sülh Fondundan yardımın qarşısını kəsib, guya bu barədə aprelin ortalarında razılaşdırılıb.

Plana görə, Avropa vergi ödəyicilərinin ciblərindən Sülh Fondu vasitəsilə 10 milyon avro Ermənistana tamamilə dinc ehtiyaclar üçün getməli idi: pulun yalnız bir hissəsi modul tipli səhra düşərgəsinin tikintisinə xərclənməsi planlaşdırılırdı".

Ekspert əlavə edib ki, Macarıstan bu paktı tamamilə əsaslı şəkildə blokladı:"Madam ki, əsgərlərə kömək edilir, bərabər yanaşma olmalı deyil? Təkcə ermənilərə niyə yardım edilsin? Macarıstanın yardımı bloklamasının səbəbi fonddan yardım alanlar siyahısında Azərbaycanın olmaması olub.

Macarıstanın bu addımı bir daha sübut edir ki, Türk Dövlətləri Təşkilatına (Macarıstan müşahidəçi qismində üzvdür) daxil olan ölkələr arasında münasibətlər o qədər güclüdür ki, Brüssel bunları nəzərə almağa məcburdur".

 

Afaq,
Musavat.com