Rusiyada miqrantlara qarşı qanunların sərtləşdirilməsinin bir neçə səbəbi var. Birincisi, daxili “düşmən” obrazı – avtoritar rejimlərdə iqtisadiyyatda, sosial həyatda hökumətin bacarıqsızlığını “izah” etmək üçün mütləq daxili və xarici “düşmənlər” lazımdır”.

Musavat.com xəbər verir ki, bu fikirləri iqtisadçı Natiq Cəfərli bildirib. O əlavə edib ki, xarici düşmənlər artıq var: “Ukrayna, Avropa, Yaponiya, Avstraliya və s. Daxildə bacarıqsız siyasəti isə miqrantlara yükləmək ən rahat və asan yoldur. İkincisi, Rusiyada siyasi-ictimai mobil qruplar yox dərəcəsindədir, ideoloji siyasi partiyalar da yoxdur, əsas passionar kütlə etnik diasporalarda cəmləşib. Miqrantlara qarşı Kremlin “səlib yürüşünün” məqsədlərindən biri də etnik diaspora təşkilatlarını zəiflətmək, onları hüquq-mühafizə orqanlarına tam tabe etmək, ciddi nəzarət mexanizmləri yaratmaqdır. Daha bir səbəb isə miqrantları öz imperialist və işğalçı siyasətlərini həyata keçirmək üçün ölməyə hazır olan əsgərlərə çevirməkdir.

SSRİ dağılanda Rusiyanın əhalisi 148 mln. 514 min nəfər idi, 2025-ci ilin yanvarın 1-nə olan məlumata görə əhali sayı 146 mln. 23 min nəfər olub. Yəni, 35 ildə əhali nəinki artıb, hətta 2 mln. 491 min nəfər azalıb. Son 35 ildə Rusiya vətəndaşlığını qəbul edənlərin sayı 17-18 mln. nəfərə yaxın olub (mənbəələrdə fərqli məlumatlar var). Yəni miqrantlar Rusiyaya gəlib yaşamasaydılar, vətəndaşlıq almasaydılar, bu gün Rusiya əhalisi 130 mln. nəfərə yaxın olardı, hətta, daha aşağı rəqəmlər görərdik, çünki, vətəndaşlıq alan miqrantların da övladları artıq Rusiya ərazisində dünyaya gəliblər. Yəni yan təsirləri də nəzərə alsaq, miqrantlar olmasaydı, Rusiya əhalisi indi 125 mln. nəfərə ancaq çatardı”.

İqtisadçının sözlərinə görə, Rusiyanın demoqrafiyasını heç miqrantlar da xilas edə bilmir: “Son 6 ildə ölənlərin sayının doğulandan daha çox olduğu görünür: “Rosstatın” məlumatına görə, Rusiya Federasiyasında əhalinin təbii azalması (ölümlərin doğumdan çox olması) aşağıdakı kimi qiymətləndirilir: 2019-cu ildə – 317,2 min nəfər, 2020-ci ildə – 688,7 min nəfər, 2021-ci ildə – 1 milyon 042,7 min nəfər, 2022-ci ildə – 599,6 min nəfər, 2023-cü ildə – 495,3 min nəfər, 2024-cü ildə – 596,2 min nəfər.

Yəni Rusiya təbii olaraq “ölür”, əhali azalır, miqrantlar olmasa hətta ac da qala bilərlər, çünki, miqrantların gördüyü işi rusiyalılar görmür-görmək istəmir. Bütün bunlara baxmayaraq Kremlin israrla şovinist anti-miqrant siyasətinin izahı ancaq daxili problemləri ört-basdır etmək üçün “günah keçiləri” axtarışından başqa bir şey deyil, məntiqsiz yanaşmadır...”

Afaq,
Musavat.com