"Rusiyanın Sankt-Peterburq şəhərində 11-12 sentyabr tarixlərində BRİCS-ə üzv və təşkilata tərəfdaş ölkələrin Təhlükəsizlik Şurasının katiblərinin görüşü keçirilib. Toplantıda üzv ölkələrin terrora və transmilli cinayətkarlığıa qarşı birgə mübarizə üsulları müzakirə olunub. Toplantıda üzv və tərəfdaş ölkələr qlobal təhlükəsizlik mövzuları ətrafında fikir mübadiləsi aparıblar. BRİCS-in zirvə toplantısı oktyabr ayında Rusiyanın Kazan şəhərində keçiriləcək".

Bu sözləri Musavat.com-a açıqlamasında politoloq Elxan Şahinoğlu deyib.

Politoloq qeyd edib ki, təşkilata üzv olmaq istəyən dövlətlərin sayı artıb, Türkiyə və Azərbaycan da təşkilata üzv olmaq istəyir:

"Türkiyə xarici və təhlükəsizlik siyasətini şaxələndirməyə çalışır. Çin və Hindistandan başlayan nəqliyyat yollarının kəsişməsində yerləşən Azərbaycanın BRİCS və Şanxay Əməkdaşlıq Təşkilatına marağı anlaşılandır.

Sankt-Peterburqdakı toplantı çərçivəsində ikitərəfli görüşlər də keçirib. Çinin xarici işlər naziri Vanq Yi Hindistanın Milli Təhlükəsizlik məsələləri üzrə müşaviri Ajit Dovalla görüşüb. Müzakirələr zamanı iki ölkə arasında sərhədyanı ərazilərdə sülh və əmin-amanlığın qorunması, həmçinin ikitərəfli münasibətlərdə normallaşmanın davamı vacibliyi vurğulanıb. Tərəflər mübahisəli məsələlərin həlli üçün səylərini artıracaqlarını vəd ediblər. Hindistan və Çin Xarici İşlər Nazirlikləri nəzdində Məsləhətləşmə və Koordinasiya üçün İş Mexanizmi vasitəsilə gərginliyi azatlmağa çalışacaqlar".

Politoloq hesab edir ki, Çin-Hindistan münasibətlərinin normallaşması Asiya bölgəsi üçün də çox vacibdir:

"Çünki iki ölkə arasında münasibətlər gərginləşəndə, sərhəddə toqquşmalar olanda, bu bölgə ölkələrinin xarici və təhlükəsizlik siyasətinə də mənfi təsir edir. Digər tərəfdən Çin və Hindistan BRİCS və Şanxay Əməkdaşlıq Təşkilatının üzvü olduqlarından münasibətləri normallaşdırmağa çalışmalıdırlar. Bu Rusiyanın da maraqlarına cavab verir. Əks halda üzv dövlətlər arasında gərginlik BRCİS və Şanxay Əməkdaşlıq Təşkilatını içəridən zəiflədə bilər. Təsadüfi deyil ki, Rusiya Prezidenti Vladimir Putin Çin və Hindistan təmsilçiləri ilə ayrılıqda görüşüb".

Politoloq sonda vurğulayıb ki, Putin Pekinlə Dehli arasında dialoqun genişlənməsində şəxsən maraqlıdır.

Xalidə Gəray
Musavat.com