Kanadanın baş naziri Mark Karni ABŞ-ın yeni iqtisadi siyasəti ilə bağlı sərt açıqlama verib.

Musavat.com xarici mediaya istinadla xəbər verir ki, baş nazir ABŞ-nin dünya lideri statusunu itirərsə, Kanadanın azad ticarət və beynəlxalq əməkdaşlıq prinsiplərini qorumağa çalışan ölkələrin koalisiyasını yaratmağa hazır olduğunu bildirib.

“ABŞ-nin qlobal iqtisadiyyatı idarə etdiyi, etimada əsaslanan ittifaqlar qurduğu və azad ticarəti təşviq etdiyi dövr başa çatıb. Bu faciədir, lakin eyni zamanda yeni reallıqdır”, - Karni bildirib.

O, Kanadanın açıq əmtəə, xidmət və ideya mübadiləsinin tərəfdarı olaraq qaldığını vurğulayıb. Onun sözlərinə görə, ölkə eyni dəyərləri bölüşən etibarlı tərəfdaşlarla ticarət əlaqələrini gücləndirəcək.

Mark Karni həmçinin əlavə edib ki, indiki şəraitdə itirilmiş Amerika təşəbbüslərini əvəz edə biləcək yeni beynəlxalq əməkdaşlığın arxitekturasını qurmaq lazımdır. O, hansı ölkələrin koalisiyaya daxil olacağını dəqiqləşdirməyib, lakin artıq bir sıra dövlətlərlə dialoqun aparıldığını vurğulayıb.

Musavat.com