“HƏMAS artıq Qəzzada mütəşəkkil hərbi qüvvə kimi mövcud deyil”.

Musavat.com Telegram kanallarına istinadən xəbər verir ki, bunu İsrailin müdafiə naziri Yoav Qalant bildirib.

Qalantın fikrincə, HƏMAS mərkəzi rəhbərliyi olmadan partizan müharibəsi aparır. Eyni zamanda, Qalant qeyd edib ki, buna baxmayaraq, İsrail rəhbərliyi hələ də terrorçularla mübarizə aparır və HƏMAS-ın liderlərini təqib edir.

Bundan əvvəl İsrailin müdafiə naziri Qəzza zolağının mərkəzi hissəsində yerləşən Netzarim dəhlizinə səfəri zamanı bildirib ki, İsrail HƏMAS liderləri Yəhya və Məhəmməd Sinvarı məhv edəcək. Qalant vurğulayıb ki, bu terrorçulara qarşı tədbir qaçılmazdır və onlar törətdikləri cinayətlərə görə məsuliyyətdən qaça bilməyəcəklər.

Bundan əlavə, Yoav Qalant Qəzzada atəşkəs və girovların azad edilməsi razılaşmalarını dəstəklədiyini qeyd edib. Onun sözlərinə görə, bu, İsrailə digər təhlükəsizlik problemlərini həll etmək üçün “strateji fürsət” verəcək.

Eyni zamanda, Qalant bu məsələdə baş nazir Benyamin Netanyahu və ifrat sağçı nazirlərlə daim qarşıdurmadadır. O, uzun müddətdir ki, İsrail rəhbərliyinin bəzi digər üzvlərinin qarşı çıxdığı sazişi dəstəkləyənlərdəndir.

Yoav Qalant qeyd edib ki, Sinvarları toxunulmaz hesab edənlər ədalətdən qaça biləcəklərinə inanan Mərvan İsa və Məhəmməd Deyfin taleyini xatırlamalıdırlar. 

“Sinvar qardaşları səhv edəcəklər və biz missiyamızı tamamlayacağıq”, - Qalant bildirib.

Nigar HƏSƏNLİ,
Musavat.com