Hazırda bütün dünyanın gözü İrandadır. Hər kəs Tehranda öldürülən İsmayıl Haniyənin qisasının nə zaman və hansı formada alınacağını, bu prosesin necə olacağını sorğulayır. Dünyanın çeşidli media quruluşları, siyasətçiləri və dövlət adamları öz açıqlama, yazı və müsahibələrində bu barədə danışır, tarix və mümkün ssenarilər barədə mülahizələr irəli sürürlər.

Musavat.com bildirir ki, mötəbər yayın orqanı olan Sky News Arabia da bu barədə məlumatla içıxış edib. Qərb kəşfiyyat mənbələrinin məlumatlarına istinad edın Sky News Arabia xəbər verir ki, İran 2024-cü ildə 12 və 13 avqusta təsadüf edən yəhudi xalqının fəlakət günü sayılan "Tişa beAv" (İbranicə: תשעה באב) günü İsrailə hücum etməyi planlaşdırır.

Xəbərdə qeyd olunur ki, HƏMAS lideri İsmayıl Haniyənin öldürülməsinə cavab olacaq İranın hücumunu çox güman ki, Livanın Hizbullah qruplaşması koordinasiya edəcək.
Musavat.com arayış olaraq bildirir ki, Sky News Arabia əsasən Yaxın Şərq və Şimali Afrikada fəaliyyət göstərən 24 saatlıq ərəb xəbər kanalıdır. Bu, Böyük Britaniya mərkəzli Sky Group və BƏƏ-də yerləşən Beynəlxalq Media İnvestisiyaları (IMI) arasında birgə müəssisədir.

Dünyanın meqa media layihələrindən olan bu quruluşun məlumatları mötəbərliyi və doğru çıxması ilə fərqlənir.

Musavat.com