Məşhur milyarder və texnologiya nəhəngi İlon Mask ABŞ-da keçiriləcək yerli seçkilərlə bağlı dramatik açıqlama verib. O, sosial media platforması X-də (əvvəlki Twitter) paylaşdığı fikirdə bildirib ki, Viskonsin ştatında keçiriləcək Ali Məhkəmə seçkilərinin nəticəsi təkcə ABŞ-ın deyil, ümumilikdə Qərb sivilizasiyasının gələcəyini müəyyən edə bilər.

Musavat.com bildirir ki, Mask bu sözləri bir istifadəçinin paylaşımına cavab olaraq yazıb. Paylaşımda qeyd olunurdu ki, əgər demokratlar bu seçkiləri qazansa, seçki dairələrinin sərhədləri onların lehinə dəyişdirilə və bunun nəticəsində Konqresdə üstünlük əldə edə bilərlər.

İlon Mask bu narahatlığa cavab olaraq yazıb:

“1000 faiz razıyam. ABŞ Nümayəndələr Palatasına nəzarət təhlükədədir. Viskonsin seçkiləri Amerikanın və Qərb sivilizasiyasının taleyini həll edə bilər!”

Məlumata görə, Mask bu seçkidə mühafizəkar namizəd Brad Şimeli dəstəkləmək üçün milyonlarla dollar vəsait ayırıb. ABŞ mediası bildirir ki, bu seçkilərə ümumilikdə 100 milyon dollardan çox vəsait xərclənib və bu, ölkə tarixində ən bahalı məhkəmə seçkisi hesab olunur.

Seçkilər bu ilin 1 aprelində keçiriləcək və nəticələri ABŞ siyasətinə ciddi təsir göstərə bilər. Maskın bu cür sərt bəyanatı isə seçkilərin təkcə daxili deyil, qlobal nəticələr doğura biləcəyini gündəmə gətirib.

 

Musavat.com