"Hizbullah"ın qurucularından olan Şeyx Naim Qasım Livan Universitetinin İlahiyyat fakültəsini bitirib və Məhəmməd Hüseyn Fəzlullahın tələbəsi olub.

O, "Hizbullah"ın aparıcı fiqurlarından biridir və uzun müddət təşkilatda baş katibin müavini vəzifəsini icra edib. Naim Qasım sabiq lider Seyid Həsən Nəsrullahın ən yaxın müttəfiqlərindən biri kimi tanınıb və Livanda, xüsusilə də şiə cəmiyyətində böyük nüfuza malikdir.

N.Qasım həm hərbi, həm də siyasi sahədə "Hizbullah"ın siyasətini formalaşdıran mühüm şəxslərdən biridir. Yeni baş katib təşkilatın ideologiyasını yaymaq, regional və beynəlxalq münasibətlərini koordinasiya etməkdə əhəmiyyətli rol oynayır. O, Livanda təşkilatın siyasi qanadının güclənməsində mühüm fəaliyyət göstərir.

N.Qasım "Hizbullah"ın İranla olan sıx münasibətləri çərçivəsində Tehranla koordinasiyanı və dəstəyi gücləndirməyə çalışır. 

Onun çıxışları Livan daxilində və bölgədəki siyasi hadisələrə təsir edir, təşkilatın ölkə siyasətindəki gücünü artırır.

İqbal RZAYEV,
Musavat.com