Çin və Honkonq Qərb mikrosxemlərinin Rusiyaya çatdırılması üçün əsas daşınma məntəqələrinə çevrilib.

Musavat.com "Bloomberg"ə istinadən xəbər verir ki, lakin son bir il ərzində Hindistan getdikcə daha çox qadağan olunmuş texnologiyaların idxalının təşkilində vasitəçiyə çevrilib: artıq Çindən sonra ikinci yerdədir.

Ticarət əməliyyatlarını izləyən ImportGenius və NBD məlumatlarını təhlil etdikdə aydın olub ki, qadağan olunmuş komponent və texnologiyaları 1995-ci ildən Rusiyaya əczaçılıq məhsulları tədarük edən Şreya şirkəti çatdırırmış.

Agentliyin məlumatına görə, bu ilin aprel-avqust aylarında Şreya Amerikanın Dell Technologies şirkətindən Rusiyaya 300 milyon dollar dəyərində 1111 ədəd ultra-modern PowerEdge XE9680 server ixrac edib. Göndərilən 998 serverin texniki xüsusiyyətləri onların Nvidia-nın H100 çipləri ilə təchiz olunduğunu göstərir. Serverlər və onların tərkibində olan çiplər hərbi-sənaye kompleksində istifadə oluna bilən Rusiyaya çatdırılması qadağan edilən malların Amerika və Avropa siyahılarına daxildir. İyul ayında ABŞ texnoloji şirkətinin yerli qolu olan Dell India bu il ölkəyə 738 serverdən ibarət ən böyük tədarükünü həyata keçirib. Artıq avqust ayında Şreya Rusiyaya 385 server göndərdi ki, bu da onun ən böyük ixrac həcmidir. Avadanlığın özü əsasən Dell International Services India Private Ltd.-nin sifarişi ilə Malayziyadan gətirilir. Bloomberg müəyyən edib ki, nəzərdən keçirilən dövr ərzində oradan 834 PowerEdge XE9680 serveri gəlib, sonra isə Rusiyaya göndərilib.

Agentlik yazır ki, bu, Şreya-nın Rusiyaya ilk dəfə 755 333 dollar dəyərində kompüter avadanlığı ixrac etdiyi 2022-ci ilin sentyabrından bəri qurduğu əməliyyatların son nümunəsidir.

Aİ-nin sanksiya üzrə baş nümayəndəsi David O'Sullivan bildirib ki, ümumilikdə, sanksiyaya məruz qalan malların Hindistan vasitəsilə tədarükü 2023-cü ilin dekabrından artmağa başlayıb. Jurnalistlər üçün keçirdiyi brifinqdə o, bunu Hindistanın siyasəti ilə deyil, “onda toplanan böyük məbləğdə rupi” ilə əlaqələndirib.

Rusiya Hindistan şirkətlərinin neft tədarükü üçün ödədiyi pulları toplamaqda çox çətinlik çəkir; Rupi konvertasiya olunmayan valyuta olduğundan, pul Hindistan bank hesablarında qalır. İkitərəfli ticarətdə balanssızlıq böyükdür: 2023-cü ildə Rusiya Hindistandan cəmi 5 milyard dollarlıq mal alıb, ona 67 milyard dollarlıq əsasən neftdən ibarət mal satıb.

Qərb ölkələrində Hindistanın Rusiyanın silah istehsalında istifadə etdiyi məhsulların çatdırılmasında iştirakından narazılıq artır.

Buna görə də ABŞ və Aİ rəsmiləri son aylarda Hindistana səfər edərək hökumətdən bu təcrübəni dayandırmaq üçün tədbir görməsini xahiş ediblər. ABŞ maliyyə nazirinin müavini Uolli Adeyemo bu yay Hindistan Sənaye Konfederasiyasına məktub göndərərək xəbərdarlıq edib ki, xarici banklar Rusiya hərbi-sənaye kompleksinə kömək edən əməliyyatların aparılmasına görə sanksiyalara məruz qala bilərlər. Lakin yüksək rütbəli amerikalı məmur deyir ki, Hindistan səlahiyyətliləri ABŞ-ın çağırışlarına o qədər də reaksiya vermir.

Bununla belə, Hindistan hökumətinin mövqeyi ilə tanış olan şəxslər Bloomberg-ə bildiriblər ki, o, Vaşinqtonun təqdim etdiyi məlumatları nəzərdən keçirib və lazımi tədbirlər görüb. Onların sözlərinə görə, bu məsələ qapalıdır, lakin Şreya Amerika sanksiya siyahısında olmayıb.

Şreya-nın əsas işi generiklər də daxil olmaqla əczaçılıq məhsullarının istehsalı və təchizatıdır. Ticarət məlumatlarına görə, o, 2022-ci ilin yanvarından 2024-cü ilin avqustuna qədər Rusiyaya 22 milyon dollar dəyərində belə mal satıb. Şirkətin saytında Rusiya Şreya-nın ən yaxşı altı ixrac bazarı arasında birinci yerdədir. Onun Rusiyadakı törəmə şirkəti "Shreya Life Sciences" Promsvyazbank-a borc verir və bu bankdan da hərbi sənaye kompleksinin maliyyələşdirilməsi üçün istifadə olunur.

Əvvəllər Şreya kompüter texnologiyaları sonradan sanksiya altına salınanRusiya şirkətlərinə satıb. Som vaxtlar isə əsasən Main Chain şirkətinə satır. Main Chain öz saytında qeyd edir ki, o, “müxtəlif xarici istehsalçılardan kompüter avadanlığının idxalı və topdan satışı sahəsində etibarlı təchizatçılarla işləyir, geniş logistik resurslara malikdir və sifariş üçün dünyanın aparıcı istehsalçılarının məhsullarını tədarük etməyə hazırdır". 2023-cü ilin yanvarında qeydiyyatdan keçmiş Main Chain-in direktoru əvvəllər turizm agentliyi və turoperatorun direktoru olmuş Anastasiya Obuxovadır. Şirkət hələlik Qərbin sanksiyaları altında deyil.

Musavat.com