Nəhəng hərbi xərclərdən həddən artıq qızışmış Rusiya iqtisadiyyatı, indiyədək artıma təkan verən əsas sektorlarda artan məhdudiyyətlər səbəbindən kəskin şəkildə soyuya bilər.

Musavat.com xəbər verir ki, bu barədə "Bloomberg"in araşdırma materialında qeyd olunur.

"Profinance"ın hesablamalarına görə, hərbçilər və biznes işçi qüvvəsi uğrunda rəqabət apardıqları üçün əmək resursları demək olar ki, tükənib, bu da müdafiə sənayesinin daha da genişlənməsini məhdudlaşdırır.

Hökumətin ipoteka subsidiya proqramlarının əksəriyyəti keçən ay başa çatdığından tikinti və bank sektoru artıq yüksək faiz dərəcələrinin təsirindən immunitetə malik deyil.

İqtisadçılar ikinci rübdə ümumi daxili məhsulun illik müqayisədə 4 faizdən çox artacağını proqnozlaşdırırlar, lakin ilin qalan hissəsində artımın bu səviyyənin yarısına qədər yavaşlaması ehtimalı var.

"Bloomberg Economics"in rusiyalı iqtisadçısı Aleks İsakov hesab edir ki, "Rusiya iqtisadiyyatı əhəmiyyətli dərəcədə soyumağa başlamazdan əvvəl son artım sıçrayışını göstərəcək".

O, Rusiyanın artımının ilin ikinci yarısında 2 faizə qədər yavaşlayacağınl, gələn il isə 0,5-1,5 faizə düşəcəyini gözləyir.

Hökumət 2022-ci ilin fevralında Ukrayna ilə münaqişənin qaynar fazasının başlamasından bəri xərcləri əhəmiyyətli dərəcədə artırıb, vəsaitləri hərbi və müdafiə sektorlarına yönəldib, ABŞ və Avropa İttifaqının tətbiq etdiyi sanksiyalara qarşı yerli biznesi dəstəkləyib.

Rusiya Bankının rəhbəri Elvira Nabiullina bildirib ki, bu, daxili tələbatın böyük artımına cavab olaraq iqtisadiyyatın 2008-ci il qlobal maliyyə böhranından əvvəlki görülməmiş səviyyələrə qədər qızmasına səbəb olub: "Əmək ehtiyatları və istehsal gücü demək olar ki, tükənib".

Artan qiymətlər fonunda staqflyasiya risklərinə qarşı çıxmaq üçün Mərkəzi Bank ötən ay əsas faiz dərəcəsini 200 baza bəndi artıraraq 18 faizə çatdırdı ki, bu da münaqişənin ilk həftələrindən bəri ən yüksək göstəricidir. Həddindən artıq istiləşmənin əsas əlaməti olan işsizlik səviyyəsi Rusiyada 2,4 faizlik tarixi minimuma enib, bu da G7 ölkələrinin hamısından aşağı göstəricidir.

Musavat.com