Beynəlxalq Cinayət Məhkəməsinin həbsini istədiyi Rusiya Uşaq Hüquqları üzrə Müvəkkili Mariya Lvova-Belova kimdir?

Beynəlxalq Cinayət Məhkəməsi Vladimir Putinlə bərabər Rusiya Uşaq Hüquqları üzrə Müvəkkili Mariya Lvova-Belovanın da həbsinə order verib.

2021-ci il oktyabrın 27-də Rusiya prezidenti Vladimir Putin Penza vilayətindən olan senator Mariya Lvova-Belovanı Uşaq Hüquqları üzrə Müvəkkil təyin edib. Bu vəzifədə o, Dövlət Dumasına deputat seçilən Anna Kuznetsovanı əvəzləyib.

Mariya Lvova-Belova 25 oktyabr 1984-cü ildə Penzada anadan olub. 2002-ci ildə Penza adına Mədəniyyət və İncəsənət Məktəbini bitirib. 2003-2005-ci illərdə Samara Dövlət Mədəniyyət və İncəsənət Akademiyasında təhsil alıb. O, Qubernatorlar Məktəbinin dördüncü buraxılışının məzunudur.

2000-2005-ci illərdə 5 və 1 nömrəli uşaq musiqi məktəblərində, Penza şəhər Mədəniyyət və İncəsənət Məktəbində gitara müəllimi işləyib. 2014-cü ildən Mariya Lvova-Belova fərdin sosial uyğunlaşmasının təşviqi üzrə qeyri-kommersiya təşkilatı təsis edib. Lui Armstronqun adını daşıyan reabilitasiya mərkəzində valideyn himayəsindən məhrum olmuş sağlamlıq imkanları məhdud gənclərin müstəqil həyata uyğunlaşmasına yardım edib.

2017-ci ildə Mariya Lvova-Belovanın təşəbbüsü ilə Penzada ağır dərəcəli əlilliyi olan gənclər üçün Rusiyada ilk “Veronikanın evi” pansionatı fəaliyyətə başlayıb. 2017-ci ilin iyunundan 2019-cu ilin yanvarına qədər - Rusiya Federasiyasının Vətəndaş Palatasının üzvü olub. 2018-ci ilin yanvarında o, Penza vilayətində Rusiya prezidentliyinə namizəd Vladimir Putinin vəkili olub.

2019-cu ilin fevralından - Ümumrusiya Xalq Cəbhəsinin Penza qərargahının həmsədri təyin edilib. 2019-cu ildə hakim “Vahid Rusiya” Partiyasından Penza şəhər Dumasına deputat seçilib.

2019-cu ilin noyabrında o, rəsmən “Vahid Rusiya” ya qoşulub. Sonra partiya Baş Şurasının Rəyasət Heyətinin üzvü, Baş Şuranın vətəndaş cəmiyyətinə dəstək üzrə işçi qrupunun həmsədri olub.

2020-ci ildə Penza vilayətindən Rusiya Federasiya Şurasının üzvü- senator səlahiyyətləri verilib. Federasiya Şurasının sosial siyasət komitəsinin üzvü kimi fəaliyyət göstərib.

Evlidir. Həyat yoldaşı Pavel Kogelman Rus Pravoslav Kilsəsinin keşişidir. Ailədə hazırda doqquz uşaq böyüyür: beş uşaq özlərinindir, dördünü isə övladlığa götürüblər. Himayəsində daha səkkiz uşaq da var.

Yeri gəlmişkən, Rusiya İstintaq Komitəsinin sədri Aleksandr Bastrıkin Beynəlxalq Cinayət Məhkəməsinin Rusiya prezidenti Vladimir Putinin və Uşaq Hüquqları üzrə müvəkkil Mariya Lvova-Belova barədə " qanunsuz qərarlar qəbul edən" konkret hakimləri kimliyini müəyyənləşdirmək tapşırıq verib.

Daha əvvəl Kremlin sözçüsü Dmitri Peskov qərarların Rusiya üçün hüquqi cəhətdən etibarsız olduğunu bildirib.

 

Orxan ƏLİYEV,
Musavat.com