Milli Məclisin deputatı Fazil Mustafaya qarşı sui-qəsddə ittiham olunan dəstə üzvləri – “Hacı Azər” kimi tanınan Azər Səricanov, Emin Əliyarov, Rəşad Əhmədov, Elşad Əsgərov və Səbuhi Şirinovun cinayət işi üzrə növbəti məhkəmə prosesi başa çatıb.

Musavat.com-un xəbərinə görə, prosesdə hökm oxunub. Hökmə əsasən, Azər Səricanov ömürlük, Səbuhi Şirinov 20 il, Elşad Əsgərov 18 il, Rəşad Əhmədov 19 il, Emin Əliyarov 4 il müddətinə azadlıqdan məhrum ediliblər.

Qeyd edək ki, 28 mart 2023-cü ildə saat 21:51-də Milli Məclisinin deputatı Mustafa Fazil Qəzənfər oğluna yaşadığı evin qarşısında “Kalaşnikov” avtomat silahından atəş açılaraq terror aktı törədilib. Faktla bağlı Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277-ci (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb.

E.MƏMMƏDƏLİYEV,
Musavat.com