Ötən il dekabrın 1-dən  Bərdə şəhərindəki Qarabağ Regional DOST Mərkəzində fəaliyyətə başlayan Ambulator Reabilitasiya Mərkəzi (“RehaPoint”)  tərəfindən bölgədə yaşayan 120-dək şəxsə ambulator formada müalicəvi bədən tərbiyəsi, əmək terapiyası, psixoloq və loqoped xidmətləri göstərilib.

Musavat.com xəbər verir ki, bu barədə Agentliyin İdarə Heyətinin sədri Anar Bayramov qurumun 2023-cü ildəki fəaliyyətinin yekunlarına və qarşıda duran hədəflərə dair keçirdiyi mətbuat konfransında bildirib.

O qeyd edib ki, əlilliyi olan şəxslər ehtiyac duyduqları reabilitasiya vasitələri ilə təmin ediliblər.

2022-ci ildən fəaliyyətə başlayan “RehaBus” (Reabilitasiya Avtobusu) layihəsi çərçivəsində isə artıq 1232 nəfərə xidmət göstərilib. A. Bayramov onu da əlavə edub ki, dövlət başçısının müvafiq Fərmanı ilə 2024-cü il iyulun 1-dən müddətli həqiqi hərbi xidmətə çağırılan vətəndaşların tibbi şəhadətləndirilməsi zamanı bir sıra qərarların qəbulu üçün yekun tibbi müayinə Dövlət Tibbi-Sosial Ekspertiza və Reabilitasiya Agentliyi tərəfindən həyata keçiriləcək. 

Tədbirdə o da qeyd edilib ki, onkoloji xəstələrə sosial psixoloji dəstək də göstərilir. 185 onkoloji xəstə artıq bu layihəyədən yararlanır.

Afaq Mirayiq
Musavat.com