Dünya Bankı ekspertləri hesab edirlər ki, 2024-cü ildə Çində 4,8 faizlik iqtisadi artım qeydə alınacaq. Onlar 2025-ci il üçün proqnozu iyunda gözlənilən 4,1 faizdən 4,3 faizə qədər yaxşılaşdırıblar.

Musavat.com Dünya Bankının Asiya hesabatına əsasən xəbər verir ki, yaxşılaşmaya baxmayaraq, proqnoz daşınmaz əmlak bazarında davamlı zəiflik, aşağı istehlakçı və biznes inamı, eləcə də struktur dəyişiklikləri, o cümlədən əhalinin qocalması və qlobal gərginlik fonunda 2025-ci ildə Çinin iqtisadi artımının yavaşlamasını nəzərdə tutur.

Dünya Bankının baş regional iqtisadçısı Aaditya Mattoo bildirib ki, bu yaxınlarda Çin səlahiyyətliləri tərəfindən elan edilən iqtisadi dəstək tədbirləri "uzunmüddətli artımı təmin etmək üçün lazım olan dərin struktur islahatlarını əvəz etmir".

İnkişaf etməkdə olan Şərqi Asiya və Sakit Okean regionunun ÜDM-nin daxili istehlakın artması, mal ixracında artım və turizmdə canlanma hesabına 2024-cü ildə 4,7 faiz, 2025-ci ildə 4,9 faiz artacağı gözlənilir.

Dünya Bankının proqnozuna görə, İndoneziyanın 2024 və 2025-ci illərdə ÜDM-də artım tempi müvafiq olaraq 5 faiz və 5.1 faiz təşkil edərək, Coviddən əvvəlki səviyyələrdə və ya yuxarıda olacaq. Malayziya, Filippin, Tayland və Vyetnamda göstəricinin Coviddən əvvəlki səviyyədən aşağı qalacağı gözlənilir.

Musavat.com