Rusiyaya verdiyi dəstəyə görə təzyiq altında olan Çin ABŞ-ın sanksiyaları altında olan və Şimali Koreya silahlarının Rusiyaya çatdırılmasında iştirak edən Rusiya yük gəmisi üçün yanalma yeri təmin edir.

Musavat.com xəbər verir ki, Reuters əldə edilən peyk görüntülərinə əsasən bu barədə məlumat yayıb.

Britaniyanın Kral Birləşmiş Xidmətlər İnstitutu (RUSI) 2023-cü ilin avqust ayından bəri Şimali Koreyaya məxsus döyüş sursatı olduğu güman edilən minlərlə konteyneri Rusiya limanlarına daşıyan “Anqara” adlı gəminin Çinin Zhejiang əyalətində gəmiqayırma zavodunda lövbər saldığını bildirib.

Peyk görüntüləri “Anqara”nın Zhoushan Xinya Gəmiqayırma Zavodunda yanaldığını göstərdi. Bu şirkət öz saytında Çinin ən böyük özəl gəmi təmiri şirkəti olduğunu qeyd edir.

Gəmi həm də özünün unikal Avtomatik İdentifikasiya Sistemi (AIS) transponderi ilə müəyyən edilib və o, çox güman ki, təhlükəsizlik səbəbi ilə Çinə gedərkən Koreya boğazının sıx hissəsindən keçərkən qısa müddətə işə salınıb. RUSI bildirir ki, fevralın 9-da Çinə gəlməzdən əvvəl, ehtimal ki, təmir və ya texniki xidmət üçün, “Angara” yanvar ayında transponderi söndürülmüş halda Şimali Koreya və Rusiya limanlarında dayanmışdı. Çinə çatdıqdan qısa müddət sonra yenidən siqnalların ötürülməsini dayandırıb.

ABŞ-ın 2022-ci ilin mayında sanksiyaya məruz qoyduğu gəmi 2023-cü ilin avqustundan bu yana Şimali Koreyanın Rajin limanı ilə Rusiya limanları arasında ən azı 11 reys həyata keçirib. Çinin Vaşinqtondakı səfirliyi “Anqara” ilə bağlı təfərrüatları bilmədiyini bildirib. Çin Xarici İşlər Nazirliyi də məsələ ilə bağlı məlumatı olmadığını elan edib. ABŞ Dövlət Departamentinin sözçüsü bildirib ki, onlar “Anqara”nın hazırda Çin limanına yerləşdirildiyinə dair “mötəbər açıq mənbə məlumatlardan” xəbərdardır və məsələni Çin səlahiyyətliləri ilə müzakirə ediblər.

RUSI-nin tədqiqatçısı Cozef Birn deyib ki, Çin hökuməti ABŞ-ın sanksiyaya məruz qoyduğu gəminin gəmiqayırma zavodunda dayandığını bilməlidir: "Əgər “Anqara”nın limanı yoxlanılmadan və təzə təmir edilmiş tərk etməsinə icazə verərsə, bu, Çinin Rusiya gəmilərinə qarşı heç bir tədbir görməyəcəyinə işarədir".

Qeyd edək ki, dünən ABŞ dövlət katibi Antoni Blinken Rusiyanın Ukraynaya qarşı müharibəsində Çinin Moskvaya hərbi yardımının rolu ilə bağlı ölkədə artan narahatlığa görə Çinə gedib.

Bundan əvvəl xarici mənbələr ABŞ-ın bəzi Çin banklarını qlobal maliyyə sistemindən kənarlaşdıracaq sanksiyalar layihəsi hazırladığına dair məlumat yayıblar. Vaşinqton ümid edir ki, belə təsir rıçaqları Pekinin Rusiya hərbi istehsalına kommersiya dəstəyini dayandıracaq.

Musavat.com