Çin hökuməti, nəhayət ki, ölkənin daşınmaz əmlak sektorunun sabitləşdirilməsinə yönəlmiş əlavə tədbirlər həyata keçirəcəyini açıqlayıb.

Musavat.com xəbər verir ki, bu barədə Çinin mənzil, şəhər və kənd inkişafı naziri Ni Honq mətbuat konfransında məlumat açıqlayıb.

Sinxua agentliyinin məlumatına görə, hökumət iri şəhərlərdə "şəhər kəndləri"nin və bərbad vəziyyətdə olan evlərin abadlaşdırılması layihələrinə dəstəyi artıracaq. Ölkədə daha 1 milyon belə mənzilin təmiri başa çatdırılacaq, onların sakinlərinə pul kompensasiyası veriləcək. Nazir qeyd edib ki, tələblərə cavab verən bütün daşınmaz əmlak layihələri ağ siyahıya salınacaq və onların ağlabatan maliyyə ehtiyacları kreditlər hesabına ödəniləcək.

Ni Honq qeyd edib ki, böyük şəhərlərdə əmlak satışları artıq tam miqyaslı stabilləşmə nümayiş etdirir və bazar üç illik tənzimləmədən sonra "dibə vurub".

Çin Dövlət Maliyyə Tənzimləmə Administrasiyasının rəhbərinin müavini Xiao Yuanqi mətbuat konfransında bildirib ki, oktyabrın 16-na olan məlumata görə, “ağ siyahı”ya düşən daşınmaz əmlak layihələri üçün təsdiqlənmiş kreditlərin həcmi 2,23 trilyon yuana (313 milyard dollar) çatıb. O, ilin sonuna qədər bu rəqəmin iki dəfə artaraq 4 trilyon yuandan çox olacağını gözləyir.

Cari ilin yanvar ayının sonunda tətbiq edilən “ağ siyahı” çərçivəsində yerli hakimiyyət orqanlarından maliyyə dəstəyinə uyğun daşınmaz əmlak layihələrinin siyahısını tərtib etmək tələb olunur. Bu mexanizm Çinin daşınmaz əmlak sektorunu sabitləşdirmək və ölkənin ÜDM-nin təxminən 6 faizini təşkil edən sənayeyə inamı artırmaq səylərinin bir hissəsidir.

Çinin Maliyyə Nazirliyi bu yaxınlarda yerli hökumətlərə satılmamış evləri və istifadəsiz torpaqları almaq üçün xüsusi istiqraz fondlarından istifadə etməyə icazə verməklə daşınmaz əmlak sektoruna kömək etmək üçün tədbirlər tətbiq etdi. Bundan əlavə, Çin Xalq Bankı bütün alıcılar üçün minimum ilkin ödəniş nisbətini 15 faizə endirib.

Musavat.com