Ötən ilin sonlarından etibarən müxtəlif hüquqi şəxslər İngiltərə Bankının kassalarından minlərlə qızıl külçəni geri götürüb.

Musavat.com The Daily Telegraph-a istinadən xəbər verir ki, son iki ay ərzində bankdan 8000-ə yaxın külçə və ya bankın ümumi ehtiyatlarının təxminən 2 faizi anbarlardan götürülüb.

Qəzet yazır ki, buna səbəb ABŞ prezidenti Donald Tramp administrasiyasının ticarət müharibələri və qiymətli metalın bahalaşması qorxusudur: treyderlər bütün böhranlı dövrlərin ən dayanıqlı mübadilə vasitəsi olan qızıla yönlənirlər.

İngiltərə Bankının sədr müavini David Ramsdenin sözlərinə görə, Nyu-York fyuçers bazarında qızılın qiyməti Londonda qiymətli metalın spot qiymətini ötdükdən sonra geri götürmə tələblərinin sayı kəskin artıb. Məqalədə deyilir ki, treyderləri Trampın külçə qızıllara tariflər tətbiq edəcəyi qorxusu da buna sövq edir.

Mərkəzi bank kimi fəaliyyət göstərən İngiltərə Bankına görə, ajiotaj nəticəsində qızıl külçələri almaq üçün gözləmə müddəti günlərdən həftələrə qədər artıb. Bununla belə, tənzimləyici bütün tələbləri yerinə yetirə biləcəyinə əmindir.

Musavat.com